Allaffissornikkut unioqqutitsisoqartoq
Pingasoriarluni akileeqquneqareerluni suli akiliisimanngimmat Namminersorlutik Oqartussat Aqutsisoqarfiata pisoq aningaasanik akiliisitsiniartarfimmut ingerlateqqittussaagaluarlugu taamaaliorsimanngilaq.
Tassa siulittaasup naalakkersuisoqarfia akiligassat pillugit ilisimatinneqarsimavoq aaqqiissutissamillu nassaartoqarluni, Aleqa Hammondillu Namminersorlutilu oqartussat Aqutsisoqarfianut akiligassai silulittaasup naalakkersuisoqarfiani kontoliornikkut akilerallarneqarlutik.
Taamaasilluni siulittaasup naalakkersuisoqarfia aningaaserivittut pissusilersorpoq, Aleqa Hammondilu akiliisitsiniartarfimmut tunniunneqarnissaa pinngitsoorluni.
Aningaaserivittut pissusilersorneq
Pisortaqarfinni taamatut iliorneq pissusissamisoortuunersoq Sten Bønsing Aalborg Universitetimi inatsisilerinermut immikkoortortaqarfimmi lektori aperaarput.
- Pisoq tusaannarlugu nalilissagukku unioqqutitsinertut nalilissavara. Pisortaqarfik aningaaserivittut sulisunut politikkerinulluunniit pissusilersorsinnaanngilaq, pisortat tamanna suliassarinngilaat, Sten Bønsing KNRimut taama naliliivoq.
Aleqa Hammondi oqarpoq siulittaasup naalakkersuisoqarfiani allaffimmi pisortap Mininnguaq Kleistip akilersuinissamik siunnersuuteqarsimasoq. Taannalu Aviisimi AGmi Naalakkersuisoqarfiup pisortaanut Svend Hardenbergimut innersuussisoq allaaserineqarpoq. Svend Hardenbergilu Namminersorlutik Oqartuassaq Aqutsisoqarfianut tikkuarpoq, taakku akilersuinissamik innersuussisimanerarlugit.
- Uanga suliassarinngilara pisoq atorfilinnut qanoq kinguneqassanersoq oqassallunga. Taamaattorli unioqutsitsisoqarsimaneranik naliliinera ilumoorpat taava kiffartuussinikkut kukkuluttortoqarsimassaaq, taamaappallu pisortani atorfillit piginnaasaat apeqquserneqarsinnaavoq sulisitsisullu tamanna iliuuseqarfigisinnaavaat, Steen Bønsing nassuiaavoq.
