Kim Leine: Allaanngilaq namminiilivinnissamut oqallinneq taartuinnanngortartoq
Atuakkiortup oqaatigivaa nunasiaataasimaneq kristumiuussuserlu ataatsimut isigalugit Kalaallit Nunaannut pitsaasimasut.
Ullumikkut pisuusimatut misigisitaanerup namminiilivinnissamullu kissaateqarnerup, nunasiaataasimanerup oqallisaanera taartuinnarsuarmut pisippaat, tamannalu allanngortinneqartariaqarsoraa.
Atuakkami oqaluttuaq Hans Egedep Godthåbimut tikinnera ukiunik pingasunik sioqqullugu aallartippoq, Hans Egede angakkorlu kalaaleq Aappaluttoq pingaarnertut oqaluttuartuutillugit. Aappaluttoq tassaavoq kalaaleq Hans Egedemut illuatungiliisoq.
AAMMA ATUARUK Kim Leinep Nuummi inuunerisimasani takoqqikkaa
Leine: Nunasiaataaneq pitsaasunik nassataqarpoq
Kim Leinep oqaluttualiamini siunertarinerarpaa, danskit kalaallillu naapeqqaarfiisa ukiui siulliit oqaluttuarissallugit. Isumaqarporlu naapinneq Kalaallit Nunaannut annerusumik iluaqutaasimasoq.
- Ullumikkut naapissimaneq isigissagaanni, isumaqarpunga illuatungeriinnut tamanut iluaqutaasimasoq. Isumaqarpungalu Kalaallit Nunaannik Kristumiuulersitsineq amerlasuutigut pitsaaqutaasimasoq. Soorlu Aappaluttoq atuakkami oqartoq: ”Isumaqarpunga danskit kristumiuussusertik nassarlugu maanga tikinnerat pitsaasuusoq. Tikinneralli allatut issimassagaluarpoq”.
AAMMA ATUARUK Kim Leine nomineret til fornem litteraturpris
Pitsaaqutit annerpaartaasa ilagisaat tassaavoq kristumiuussuseq. Taassumami kalaallit kuisimanngitsutut ilungersunartumillu inuunermit aniguisippaat, allassinnaassuserlu nassataralugu. Tamannalu oqaatsit kulturillu ullumikkut attanneqarnerannut peqqutaanerpaavoq.
- Tupinnarluinnartumimmi pisoqarpoq, kalaallit tamarluinnangajammik atuarneq allannerlu, 1700-ikkut ingerlanerini, ilikkarpaat. Tamannalu kulturikkut siuariarujussuarnermik kinguneqarpoq. Taamaasillunimi allassinnaaneq atorlugu imminut oqaluuserisinnaanngortitsivoq, imminullu allaaserisinnaallunilu paasisinnaanerulerluni, kinguaariinnut tullernut tunniussisinnaalerluni kiisalu sumiiffinnut ungasissumiittunut attaveqatigiilersinnaalersitsilluni.
Leine: Kalaallit Nunaat politikerimik sapiitsumik amigaateqarpoq
Nunasiaataanerli nuannersuinnaasimanngitsoq, Kim Leinep nassuerutigaa. Kristumiuussusermut nunallu allat kulturiinut nuunneq sukkavallaarsimavoq, kinguaarinnullu tarnikkut ikilersuisimalluni.
- Kulturikkut siuariataarsimaneq pissutaalluni annaasaqarsimaneq, isumaqarpunga Kalaallit Nunaanni ullumikkut suli anniaatigineqarpoq. Leine oqarpoq.
Tamanna ersertarpoq, ingammik Kalaallit Nunaata namminiilivinnissaa pillugu oqallinnermi, tamannami Kalaallit Nunaanni Danmarkimik pisuutitsinermik tunngavilerneqarpoq, kiisalu Danmark Kalaallit Nunaat nunasiaatigisimaneranut kanngusulluni.
AAMMA ATUARUK Kim Leine Nunatsinnut tunngasumik nutaamik atuakkiortoq
- Allaanngilaq namminiilivinnissamut oqallinneq taartuinnanngortartoq, oqallissutissanik tamanik noqitsisoq. Inuttut ajornartorsiutit aningaasaqarnermullu tunngasunik ajornartorsiutit oqallinnermut taartuinnarsuarmut millugussaasartut, imatullu oqariartuuteqalerlutik. ”Namminiilivinniarpugut, tamannalu danskit pisuussutigaat. Danskillu tamanna tigusarlugu, taamaasillunilu oqallinneq maskiinatut ingerlaaginnalertarluni. Tamannalu qimanneqartariaqarsoraara.
Kim Leine naapertorlugu tamanna aatsaat pitsaanerpaamik pisinnaavoq Kalaallit Nunaanni politikereqalerpat namminiilivinnissap ullulerneqarnissaanut sapinngitsumik peqalerpat. Aamma tamanna inuiaqatigiit atugarissaarnerannut annertuumik millisitsissagaluarpat.
Atuagaq Kalaallit Nunaata nunasiaataasimaneranut tunngasunik atuakkat pingasuusussat aappaarivaat.
