Aleqa: Timmisartut qulaattarneri Nunatta millionerpassuarnik iluanaarutigisinnaavai?

Timmisartut qulaattarneri Norgep ukiormanna 220 millionit koruuninik iluanaaruteqarfigisussaavaa, danskilli assartuussinermut ministererisimasaat naapertorlugu, timmisartut qulaattarneri aningaasatigut iluanaarutigineqarsinnaanngillat. Siumut tunuliaqutaralugu Folketingimut ilaasortap Aleqa Hammondip tamanna maanna misissorluarnialerpaa.
Assi © : KNR
Allattoq Simon Uldum -
aggustip 13-at 2015 07:14

Timmisartut angallannerisa aqunneqarnerata Nunatsinnut nuunneqarnissaa sivisuumik oqallisaasimavoq. Siumumeersorlu Doris Jakobsen tamanna pillugu 2014-imi aamma apeqquteqarpoq.

Ukiup affaa utaqqereerluni assartuussinermut ministerimit akineqarpoq Kalaallit Nunaata Danmarkillu Sakkutuujunngitsut Timmisartuunneqartarnerisa Isumannaatsuunissaat pillugit Suleqatigiiffimmut ICAO-mut isumaqatigiissutaat naapertorlugu timmisartut qulaattarneri aningaasarsiutigineqarsinnaanngitsoq.

Ministerip akissuteqarnermini aamma eqqaavaa tamanna Canadamut Islandimullu, Kalaallit Nunaata silaannaatigut timmisartut angallannerisa aqunneqarnerinik suliaqartuusunut aamma atuuttoq.

AAMMA ATUARUK Doris J. Mogens Lykketoftimut naammagittaalliortoq

 

Norgemiunut iluanaarutaalluartoq
Norge aamma ICAO-mut ilaasortaavoq - Norgelu ICAO-p siunnersuisooqatigiivini aqutsisuusuni maannakkorpiaq ilaasortaalluni. Taamaakkaluartoq Norgemiut nutaarsiassaqartitsiviata NRK-p allaaseraa Norgep timmisartut qilaattarnerinut akiitsuusersuisarnermigut isertitani annertusarniarai, taakkulu timmisartortitseqatigiiffinnit persiap kangerliumangarnaasuunerussasut, naak timmisartortitseqatigiit anginerit Norgemi suliaqanngivissortuusut imaluunniit killiliinnarmik suliaqartartut.

Allaaserisami tassani aamma oqaatigineqarpoq Norgep timmisartut Norgemut minngisaannartussat Norgemiut aningaasaataannik 220 millionit koruuninik isertitaqarfigissagunarai.

Siumut tunuliaqutaralugu Folketingimut ilaasortap Aleqa Hammondip tamanna misissorluarnialerpaa.

- Ministerip apriilip qaammataani akissutaa Norgemit nalunaarutigineqartunut naapertuutinngilaq. Tamatta isertitaqarfigisinnaasatsinnik nutaanik ujarlerlutalu suliffinnik nutaanik pilersitsiniarluta ilungersorpugut. Taamaammat timmisartut angallannerisa nakkutigineqarnerata iluani suliffiit Nunatsinnut nuunneqarsinnaanerinut periarfissat misissorpagut, aalajangiitinnatali pitsaasumik toqqammavissaqartariaqarpugut. Danskit naalakkersuisuinit iluamik akineqartariaqalerpugut, Aleqa Hammond taama oqarpoq.

Tamannalu tunngavigalugu Aleqa Hammondip danskit assartuussinermut ministeriannut Hans Christian Schmidtimut ullumi ima apeqquteqaateqarpoq:

”Ministerip nassuiarsinnaavaa Norge qanoq iliorluni - nrk.no-mi aggustip pingajuani allaaserisaq naapertorlugu - Norgep silaannaatigut timmisartut qulaattarnerinut 220 millionit koruuninik iluanaaruteqarsinnaanersoq, assartuussinermummi ministeriusimasup Kalaallit Nunaannut tunngasunut ataatsimiititaliamut akissuteqarluni nassuiaatigisimavaa nunat timmisartunik qulaanneqartarnerinut isertitat aningaasartuutillu assigiittussaasut?"