Aleqa pisortarlu aaqqiagiinngitsut

Suliaq ilaatigut angalasarnermut aningaasartuutinut tunngasoq, folketingimi ilaasortap Aleqa Hammondip Siumullu Christiansborgimi allattoqarfiani pisortap akornanni avissaartuutilersitsivoq.

Allaffeqarfiup pisortaanik soraarsitsinermik folketingimilu politikerip aningaasanik taarsiinissaanik piumasaqaateqarnermik suliaq inerneqarpoq.

Folketingimi ilaasortap Aleqa Hammondip Siumullu Christiansborimi allattoqarfiani pisortap Kenneth Rasmussenip akornanni isumaqatigiinnginneq, pisortamik maajimi soraarsitsinermik kinguneqarpoq.

Christianborgimi qaammatit qulingiluaannarni suleqatigeereersullu taama pisoqarpoq.

Paasissutissat KNR-ip pissarsiai naapertorlugit Aleqa Hammondip upernaaq qaaqqusaaffimminut, Arctic Winter Gameseqarnerani Nuummut angalanerani suliaq ilaatigut pineqarpoq.

Angalanermi tassani Siumumi politikereq Nuummi innuttaasunik ataatsimiititsivoq, KNR-imilu paasissutissat naapertorlugit Kenneth Rasmussen atorfimmit suliassaqarluni angalaqataanissamut piumaffigineqarsimavoq.

Aleqa Hammondili kingusinnerusukkut taamaannginneraavoq, Kenneth Rasmussen sulinngiffeqarluni angalasimasoq nassuiaatigalugu.

Taava aamma Siumup Christiansborgimi allaffiani assigiinngitsut arlallit isumaqatigiinnngissutigineqarput.
Allattoqarfimmi pisortap sulinermi peqatigiiffia Aleqa Hammondimut aningaasanik piumasaqaateqarnera, suliap killiffigaa. Piumasaqaalli itigartitsissutigineqarpoq.

Taamaammat Kenneth Rasmussenip sulinermili peqatigiiffiup folketingimi politikerimut aaqqiagiinngissut eqqartuussivimmut suliassanngortissanerlugu eqqarsaatigigaat, KNR-imit paasineqarpoq.

Kenneth Rasmussenip soraarsitaanera Aleqa Hammondip KNR-imut uppernarsarpaa, sulialli sulisunut tunngasuunera tunngavigalugu allamik oqaaseqarusunngilaq.