Aleqa ministeriunermut qujassuteqartoq
- Tatigivassi, Aleqa Hammond oqarpoq.
Folketingimi ilaasortat, ministeriunerup ammanersiornermi oqalugiaataa ullumi oqaluuserigaat, Aleqa Hammondip Nuummiinnissani toqqarsimavaa, Inatsisartuni pisussat qanimut tassani malinnaaviginiarlugit.
Taarsiullugu ministeriunermut Lars Løkke Rasmussenimut ammasumik allagaqarpoq, folketingimi ammaanersiortoqarneranut atatillugu isummani annillugit.
AAMMA ATUARUK Kinamiut mittarfinnik suliaqartinneqarnissaanik USA mianersoqqusivoq
Danmarkimi naalakkersuisut, Atlantikup Avannaanit ilaasortanik tikilluaqqusillutillu Folketingimi politikkikkut aalajangiinernut peqataatitsisarnerat, Hammondip aallarniutigalugu nersualaarpaa, naalagaaffiullu Kalaallit Nunaanni mittarfiliortiternernut peqataanera aamma nersualaarlugu:
- Danskit aningaasaleeqataaniarnerat tikilluaqquarput. Siusinnerusukkut oqaatigereernikuuarput aningaasaliisoqassatillugu danskit aningaasaleeqataanissaat, nunanit allanit aningaasaliisarnernit kissaatigineruarput, Aleqa Hammond oqarpoq.
Danmarkip Issittumi aningaasaliisarnermut atatillugu akuunerusarnissaa, Folketingimut Inatsisartunullu ilaasortap qasseerpassuariarluni kissaatigisarsimallugu oqaatigaa, Danmarkip Issittumut politikkikkut aningaasatigullu tapersersuisarnerunissaa ujartorlugu.
AAMMA ATUARUK Danskit partiivisa arlaqartut kinamiut suliarinninniarnerat ernumanartoqartikkaat
Kinap nunatsinnut soqutiginninnerujussua Danmarkimi politikerit ilaatigut isumakuluutigaat, taamaattoqartariaqanngitsorli Aleqa Hammondip oqaatigaa, Kinamit aningaasaliisoqarnerusinnaanissaa ammaffigalugu.
Naalagaaffiulli Kalaallit Airportsimut aningaasaleeqataaniarneratigut Danmarkimit aningaasaliisoqarnerusinnaanissaa neriuutigaa:
- Aningaasaliinerit suleqatigiinnermik ullumikkornit suli anginerusumik nassataqartussaq periarfissinneqassagaluarpoq, nanginneqartussarlu Kalaallit Nunaat tamakkiisumik naalakkersuinikkut namminersulerpat, Aleqa Hammond oqarpoq.
Ministeriunerup Lars Løkke Rasmussenip Folketingip ammaanersiorneqarnerani oqalugiaataa pillugu oqallinneq Folketingip nittartagaani malinnaavigineqarsinnaavoq.
