Aleqa Hammond: Siumup politikkia allanngunngilaq

Taamaalilluni Siumut, ukiuni 30-ni siuttooreerluni, siullermeerluni illuatungiliuttunngortussanngorlunilu arnamik siulittaasoqalerpoq. Qineqqusaarnermi Siumup suliniutissatut saqqummiussai Aleqa Hammondip sulissutigissallugit neriorsuutigaa, erseqqissaatigalugu Siumut politikkut anguniakkaminik allannguuteqassanngitsoq.

Siulittaasuujunnaartoq siulittaasunngortorlu assigiinngissuteqarput, tassami Aleqa Hammond arnaavoq.

- Taanna allaanerussutini annerpaavoq. Aammali inuttut eqqarsariaaserput, peroriartorsimanerput suleriaaserpullu assigiinngitsorujussuupput. Qularnanngilarlu, anguniakkatta piviusunngortinniarneranni assigiinngitsunik iliuuseqartassasugut, Aleqa Hammond oqarpoq.

- Partiitta nutaamik kiinernissaa massakkut pingaartuuvoq. Suleqatigiumaneqarnera ilaasortattalu aallunneqarnissaat annertusagassaavoq. Siumumimi anguniakkatsinni pingaartittuarparput, nunaqarfiit nukittorsarneqarnissaat, piniartukkormiut pitsaasumik inissisimanissaat pissakilliortullu ikiorserneqarnissaat. Aammali pitsaasumik angusaqarusuttut inuiaqatigiinni kivitserusuttut assigiimmik pisinnaatitaaffeqartillugit nukittorsarneqarnissaat sulissutigissavarput, Siumup siulittaasortaava Aleqa Hammond oqarpoq.

Qinersinermut siulianut naleqqiullugu qinersinermi uani Siumut 3,9 procentimik kinguariarpoq. Siumup inatsisartuni ilaasortaatitai ataatsimik ilanngarlutik. Taamaakkaluartoq, Aleqa Hammond isumaqarpoq, partiip qinersisartui aalaakkaasuusut.

- Siumumi kinguariaatigisimasarput annertunngilaq, unamminartorujussuartullu isigisariaqarani. Siumup takutikkumaarpaa, illua tungiliuttuugaluarluni sorsuutiginnilluni anguniakkanik angusaqarsinnaaneq ajornanngitsoq, Aleqa Hammond oqarpoq.

Siumup Naalakkersuinikkut siuttuunerani naalakkersuisuni ilaasortaasarsimasut namminneq tunuartarsimapput, allat tunuartitaallutik, kingullermillu naalakkersuisunut ilaasortaasimasoq ataaseq pisortat aningaasaataannik atornerluisimasutut Nunatta eqqartuussiviani eqqartuunneqarpoq.

Aleqa Hammondip qalleqqissarpaa, qinikkatut atornerluineq sunaluunniit Siumup akuersaanngimmagu.

- Inuiaqatigiinni atornerluineq sunaagaluarpalluunnit naaggaarparput. Taama ittoqannginnissaanut suleqataanissaq pisussaaffigaarput. Siulittaasutut sulininni pingaartitassama annerit ilagivaat tatiginassuseq sulinitsinni sakkussatut pingaarnertut atussagipput, Siumumi siulittaasunngortoq, Aleqa Hammond, oqarpoq.