Aleqa Hammond issittoq pillugu isummersuisini nutaami ilaasortaassaaq
The Polar Research and Policy Initiative tassaavoq nunarsuarmi issittumut sikuiuitsumullu tunngasunut isummersoqatigiiffik Londonimiittoq. PRPI namminersortuuvoq politikkikkullu arlaannaanut attuumassuteqarani.
Aleqa Hammond isummersuisit siulersorneqarnerannut peqataassaaq. Isummersuisit Londonimi The Travellers Clubimi sisamanngorpat februaarip 18-ani pilersinneqassapput.
Isummersuisinik pilersitsineq nunat naalagaaffiit suleqatigiit kattuffiannit, suleqatigiit aallartitaannit allaniillu issittumut soqutigisalinnit peqataaffigineqassaaq.
PRPI-p siunertaraa Tuluit Nunaanni naalagaaffiillu suleqatigiit akornanni issittoq pillugu annertunerusumik ilisimasaqarnerulernissaq pissutsinullu immikkuullarissunut paasinninnissaq.
Aamma Tuluit Nunaata naalagaaffiillu suleqatigiit issittumi annertunerusumik ilisimatusarnikkut, kulturikkut, politikkikkut niuernikkullu peqataanerulernissaat siunertaavoq, aamma PRPI-p issittumi inuiaqatigiit politikkikkut isumaginninnikkullu unammilligassaat sammineqartassapput, minnerunngitsumik avatangiisinut tunngasut.
