Aleqa Hammond: Aninissara nammineq toqqarpara
Aleqa Hammond Siumumi ilaasortaajunnaarpoq. Tamannalu nammineq aalajangigaralugu Ritzauimut oqarpoq.
Tamanna pivoq Aleqa Hammond Folketingimi qinikkatut atorfeqarnerminut atatillugu kreditkortiminik 13.000 koruuningajaat nalinginut nammineq atugassaminik pisiortorsimanerata kingorna.
- Siumumi ulluinnarni aqutsisut Folketingimit tunuarnissannik taamaaliornikkullu sinniisup isernissaannik toqqagassippaannga. Taamaaliunngikkumalu Siumut Folketingimiinninni tunuliaqutaasinnaanngitsoq ilisimatinneqarlunga, Aleqa Hammond Ritzauimut oqarpoq.
Folketingimut ilaasortaaffimmi attatiinnarniarnera KNR-imut ima itisilerpaa:
- Politikeriuvunga qinersiserpassualik. Qinersisimma nalunngilaat assoralimaareerlunga politikkikkut anguniakkama angunissaat ilungersuutiginiarlugu neriorsuuteqarlunga qinigaasunga. Innuttaasunut taamani aamma oqaatigaara kukkussuteqarsimallunga. Tamannalu tunuliaqutaralugu, aamma uanga Folketingilu pisoq naammassisutut nalilereerlugu, ingerlaqqissaanga. Isumaqarama nukissaqarlunga, tunniutiinnarnangalu ingerlaqqikkusullunga, Aleqa Hammond oqarpoq.
- Suliassat qinigaassutiginikuusakka sulissutiginiarlugit neriorsuinikuuvunga. Taamaammat attaviitsutut Folketingimi ingerlaannarnissara aalajangiuppara, Hammond oqarpoq.
Aleqa Hammondip nassuiaanera naapertorlugu, nammineq akiliutini matuneqarsimammata Folketingimit kreditkorterisani ajornartoornermini atorsimavaa.
Aamma atuaruk Kim Kielsen: Aleqa Siumumit anisinneqarpoq
Taamatulli nassuiaateqarnera pivoq, Nuummi atortussaarniarfimmi Starkimi Brugsenimilu aningaasarpaalunnik atuisimanera kontumi uninngasuutigineqartut assilineqarneratigut uppernarsarneqareersoq.
Folketingimit korti akiliutissatut atugassiissutigineqartoq politikerit qinigaaffimminnut atatillugu, assersuutigalugu timmisartorluni angalanissamut imaluunniit taxarnermut, taamaallaat atoqqusaagaluarpoq.
Folketingip Allaffeqarfia ataasinngornermi ataatsimiittoqareersoq nalunaarpoq aningaasat atorneqarsimasut Aleqa Hammondip akissarsiassaanit ilanngaatigineqassasut.
Aamma atuaruk PISUT Kreditkortimik atuineq pillugu allaaserisat tamaasa
Pisulli ingerlasimanerat Aleqa Hammondip ajuusaarutigai.
- Ulluni kingullerni pisut ilungersunarput. Sulininnulli tunngatillugu ilungersornera allanngunngilaq, tamannalu tunngavigalugu allatseqarfiga peqatigalugu Folketingimi sulinera ingerlateqqissavara, KNR-imut taama oqarpoq.
Siumut Folketingimi suleqatigisaata Socialdemokraatit, Aleqa Hammondip attaviitsunngornera qanoq kinguneqassanersoq maannakkorpiaq oqaaseqarfigerusunngilaat. Henrik Sass Larsen KNR-imut taama oqarpoq.
/ritzau/
