Aleqa Hammond aningaasanut inatsisissamut isumaqatigiinniarnermi ataatsimiigiaqqusaaqqittoq
Attaviitsummi Aleqa Hammondip nunatsinnit kissaatigineqartut pillugit danskit aningaasaqarnermut ministeriat Kristian Jensen (V) marloriarluni oqaloqatigaa.
Aleqa Hammondillu Folketingimi ilaasortat nunatsinneersut tusaaniarneqarnerinut danskit naalakkersuisui nersualaarpai.
- Ullumikkut (ataasinngorneq, aaqq.) ataatsimiinnitta ersiutigaa oqariartuutigisartakkatsinnik tusaaniartoqartoq, Hammond tusagassiorfinnut nalunaarummi taama oqarpoq.
Sammisallu arlallit aningaasaqarnermut ministerip, ataaviitsoq naapertorlugu, nangeqqikkusutai saqqummiuppai.
Ilaatigut nunaqarfinni kommunefogedissaaleqineq, kalaallit Danmarkimi ilagiit sinniisoqarnerat kiisalu pinerluuteqarsimasunut inissiisarfinni betjentit ilinniaqqittarnerat. Kingullertullu taaneqartumut danskit naalakkersuisui inissiisarfinni betjentit ilinniaqqittarnerinut katillugit 2 millionit koruunit immikkoortinniaraat, Aleqa Hammondip ilisimatitsissutigaa.
Illersuisulli ilinniartitaanerinut aningaasanik amerlanerusunik immikkoortitsisoqassagunanngilaq.
AAMMA ATUARUK Aleqap illersornissamut ministeri ataatsimeeqatigigaa
Aleqa Hammondilli danskit naalakkersuisui kajumissaarpai suliassaqarfimmut aningaasaleeqqeqqullugit, danskit naalakkersuisuisa eqqartuussiveqarnermut 10 millionit koruuninik aningaasaleeqqinnissamik siunnersuutigisaat naammanngimmata, soorlu aamma tamanna nunatta illersuisuuneranit Finn Meinelimit qanittukkut erseqqissaatigineqartoq. Taassuma sermitsiaq.ag-mi naliliinera naapertorlugu illersuisut ilinniartitaanerat 6 millionit koruuninik akeqassasoq.
ICC-p danskit naalakkersuisuinit 1 million koruuninik tapiiffigineqarnissaa Aleqa Hammondip nuannaarutigaa.
- ICC ukiorpanngortuni nunani allani tusaaniarneqarluartarpoq. (...) ICC-ip taperneqarnera Naalakkersuisut (danskit naalakkersuisui, aaqq.) nunap inoqqaavi pillugit suliniarneranik ataqqinninnertut taasariaqarpoq, Aleqa Hammond taama oqarpoq.
ICC nunatta karsianit ukiuni kingullerni aningaasatigut tapiiffigineqartarnermigut annaasaqarsimavoq. Tapiissutaasartullu ikiliartornerat Aleqa Hammondip 2013-imi Naalakkersuisuni siulittaasuunerata nalaani aallartippoq.
AAMMA ATUARUK Isumaqatigiinniarnerit ingerlanneqaraluartut Aleqa Folketingimi najuutinngilaq
