Aaqqissuisuuneq: Aleqa Folketingimi ilungersortussanngorpoq
AG-p aaqqissuisuunera ulluinnarni Christiansborgimiittartoq, Christian Schultz-Lorentzen taama oqarpoq.
- Ataguli takoqqaalaariartigu, arlaatigut eqqumiikaluanilluunniit ilissarsiorsinnaanersoq. Kisianni soorlu ajornartorsiussasoq, Christian Schultz-Lorentzen oqarpoq.
Aamma atuaruk Siumut: Taamaammat Aleqa anisipparput
Socialdemokraatinit suleqatigineqarunnaartoq
Aleqa Hammond Siumumit folketingimut aallartitatut Christiansborgimi Socialdemokratit gruppianni suleqataasimavoq.
Christian Schultz-Lorentzenilu naapertorlugu Folketingimi gruppimi annerpaami ilaajunnaarluni ajunaaruteqarnerujussuuvoq.
- Sulianik annerusunik misissugassaqartillugu Socialdemokratit allattoqarfiat ikiortiserisinnaagaanni siuariarnerujussuussaaq. Taava aamma allaffimmi sulisut kisimeeqatiginagit gruppimut annerusumut peqataagaanni taattorinnarnerussaaq, Christian Schultz-Lorentzen oqarpoq. Taamaammat Aleqa Hammond politikkikkut attaviitsuulluni sulissaaq.
Aamma atuaruk Socialdemokraatit Aleqa Hammond suleqatigiunnaaraat
Ataatsimiititaliani ilaasortaaffiit annaasinnaagai
Folketingimi sulinerup ilatsiarsua ataatsimiititaliani ataavartuni pisarpoq, Aleqa Hammondilu Socialdemokratit folketingimi gruppiannut ilaanermigut ataatsimiititaliani arfinilinni ilaasortaammat, ilaasortaaffini attatiinnassanerai nalunarpoq.
Folketingillu ukiua pisarneq malillugu oktobarimi marlunngorneq siulleq aallarnerneqarpat, tamanna aalajangerneqassaaq.
Gruppeqaranili ilungersunartuusoq oqaluttuarisaanermi takussuserneqarsimasoq, Christian Schultz-Lorentzenip oqaatigaa.
Aamma atuaruk VIDEO Politikkikkut naliliisartoq: Aleqap Nunatta tusaamaneqarnera innarlerpaa
Attaviitsut 53-it 1945-miit Folketingimiissimapput, soorlu ilaatigut Uffe Elbæk, Pia Christmas-Møller, Peter Brixtoftelu. Taakku piffissami sivikitsumi sivisuumiluunniit partiimik tunuliaqutaqarnatik Folketingimiipput.
- Pisoq sakkortuvoq, Aleqa Hammondimullu Siumumik qimatsineranut pissutaasut eqqarsaatigalugit suli sakkortuneruvoq, tassalu kanngunartuliaavoq, Aleqa Hammondimut kaanngartikkuminaatsoq, allaallumi aappassaa kanngunartuliorluni, Christian Schultz-Lorentzen oqarpoq.
Aamma atuaruk PISUT Kreditkortimik atuineq pillugu allaaserisat tamaasa