Politikki Inuussutissarsiutit

Alcoamik suliaq Qujaukitsumit suli upperineqarpoq

Alcoap Nunatsinni aatsitsiviliornissaanut pilersaarutip ingerlaannarnissaa, Inuussutissarsiutinut, Sulisoqarnermut, Niuernermut Nunanullu Allanut Naalakkersusumit Vittus Qujaukitsumit suli upperineqarpoq.

Vittus Qujaukitsoq sammen med den arktiske ambassadør og udenrigsdirektøren

Allattoq Nauja Møller, Jonas Fievé

aggustip 25-at 2015 14:35

Maniitsumi innuuttaasunik ippassaq ataatsimiisitsinermi Alcoamit nalunaarutigineqarpoq, aluminiumik aatsitsiviliornissamik pilersaarut kinguarteqqinneqartoq.

- Suliamut tunngatillugu nutaarsiassaqanngilaq, Vittus Qujaukitsoq KNR-mut oqarpoq.

Aamma atuaruk VIDEO Maniitsup eqqaani aluminiumik aatsitsiviliornissaq unitsinneqarallartoq

Naak innuttaasunik ataatsimiisitsinermi, ukiut 2008-miit 2015-mut aluminiup akia 47%-nik appariarsimagasoq Alcoamit saqqummiunneqaraluartoq taamaattumillu ukiuni aggersuni qanoq pisussaaneri neriunarfigineqarsinnaanngitsutut oqaatigineqaraluartoq, Maniitsup eqqaani aluminiumik aatsitsiviliornissamik pilersaarutip unitsikkallarneqarneranut oqartoqarnera Vittus Qujaukitsup ilumuunnginnerarpaa.

- Tassami Maniitsup eqqaani aluminiumik aatsitsiviliornissamik suliaq unitsinnagulu qimanngilarput, allanngortinneqarani suli ingerlavoq.

Erngup nukinganik innaallagissiorfiliornissamut Naalakkersuisut misilillugu aningaasaliisussanik ujartuissasut, Naalakkersuisut Alcoallu akornanni isumaqatigiittoqarsimasoq Innuttaasunik ataatsimiisitsinermi saqqummiunneqarpoq,

Periarfissaavoq pitsaaneq

Vittus Qujaukitsullu oqarnera malillugu tamanna eqqarsarluarnerup kinguneranik sulineruvoq.

- Tamanna Namminersorlutik Oqartussanut periarfissaavoq pitsaaneq taamaalilluta suliniummut pituttorsimanata suliniuteqarnissarput aallutissallutigu, Vittus Qujaukitsoq oqarpoq.

Erngup nukinganik innaallagissiorfiliornissaq, aatsitsivilissuarmut innaallagissamik pilersuisussaq, Maniitsup eqqaani aluminiumik aatsitsiviliornissamik pilersitsisoqarnissaanut piumasaqaatinut ilaavoq.

Erngup nukinganik innallagissiorfissap atuutilernerani tamanna suliffeqarfinnit allanit atorluarneqarsinnaanera, Vittus Qujaukitsumit maanna isummerfigineqarusunngikkallarpoq.

- Erngup nukinganik innaallagissamik atuinissamut qinnuteqartoqarpat tamanna aatsaat eqquutissaaq.

- Siunissami pilersinneqarnissaa ilimagineqarsinnaanngippat, unitsikkallarneqarneranillu oqartoqarsinnaanngippat, taava qanoq paasisariaqara?

- Oqaqqissaanga, nunatta aluminiummip nunarsuarmi akia piumaneqarneralu ataasinnguamilluunniit sunnersinnaanngilaa, Inuussutissarsiutinut, Sulisoqarnermut, Niuernermut Nunanullu Allanut Naalakkersusoq Vittus Qujaukitsoq, taama oqarpoq.