Alcoa pakatsissutigaat

Maniitsumi nunarsuarmi aluminiumik tunisassiortartut annersaasa tulliata innuttaasunut ataatsimiisitsinerminni aluminiumik aatsitsiviliornissaq ukiuni aggersuni neriunarfigineqarsinnaanngitsutut oqaatigaat.
aggustip 25-at 2015 18:02

Tamannalu pillugu politikerit Qeqqata Kommuniani Alcoap suliffissuarmik sanaartornissamut kinguartitseqqinnera pakatsiffigalugu oqaatigaat.

- Uanga nammineerlunga isumarluarnikuugaluarlunga maannakkut saqqummiinerat malillugu pakatsinarpoq maani Maniitsumi aluminiummimut aatsitsiviliorniarnera Alcoap soorlu qatangiinalersutut isikkoqarallartoq maannakkut, Qeqqata kommuniani kommunalbestyrelsemut siumut sinnerlugu ilaasortaq Maniitsumeersoq, Karl Lyberth taama oqarpoq.

Aamma atuaruk Alcoamik suliaq Qujaukitsumit suli upperineqarpoq

Ippassarmi Naalakkersuisut Qeqqatalu Kommunia Alcoa peqatigalugu aluminiumik aatsitsiviliornissamut paasissutissat kingulliit pillugit innuttaasunik ataatsimiisitsimmata tusarliunneqarpoq aluminiumip akia ukiuni arfineq pingasuni kingullerni 47 procentimik appariarsimasoq. Tamannalu Karl Lyberthimut tusarliunneqarnera neriuutaarutsitsivoq:

- Taamatut nassuiaanerat imatut paasivara, taamatut ingerlaannassappat maani Maniitsumi aluminiummimut aatsitsiviliornissaq ilimanarpallaanngitsoq ukiuni tulliuttuni oqaatigisariaqartoq, Karl Lyberth oqarpoq.

 

Unittuuinnartoqarani ingerlariartoqqittoqarsinnaanera aallartiffissaavoq ajunngitsoq

Ataatsimiinnermi qaaqqusisunut peqataapput Qeqqata Kommunia, tassanilu Borgmesterip Hermann Berthelsenip innuttaasut ataatsimeeqatigai, parteeqatiminiillu Karl Lyberthimit tusarliunneqartunut akuersaarneruvoq:

- Soorunami uggornartorujussuuvoq oqariartuutaat imaanngimmat tassa sanalerlutik, kisiannili suli utaqqillugu sanariarnissaminnut periarfissartik. Taamaakkaluartorli arlaatigut taamatut unittuuinnartoqarani ukiuni marlunni tulliuttuni ingerlariartoqqittoqarsinnaaneranik eqqarsartoqarnera isumaqarpunga taanna aallartiffissaasoq ajunngitsoq, Qeqqata Kommuniani Borgmesteri, Hermann Berthelsen oqarpoq.

Aamma atuaruk VIDEO Maniitsup eqqaani aluminiumik aatsitsiviliornissaq unitsinneqarallartoq

Ippassaq saqqummiunneqartunut ilaavoq Namminersorlutik oqartussat Alcoallu akornanni isumaqatigiissutip ukiuni marlunnik sivitsorneqartoq, tassani siunertaalluni periarfissat allat ujartorneqarnissaat.

 

Isumalluartuaannartariaqarpugut

Pilersitsiniarnermullu suliniut ukiuni kingullerni qulini ingerlareeraluartoq suli takussaasumik alloriaqqittoqanngilaq. Taamaakkaluartoq borgmesteri suli neriuuteqarpoq.

- Isumalluartuaannartariaqarpugut unitsivinneranik oqartoqarnissaata tungaanut, taavalu unitsivinnginnerani aamma allanik ujarlertoqarsinnaaneranik periarfissaqalersinnaanera taanna isumaqarpunga suli arlaatigut qanoq iliortoqarsinnaaneranik isumalluartariaqarluta, naak immaqa siunissami Alcoassanngikkaluartorluunniit, Hermann Berthelsen oqarpoq.

Parteeqataalu Karl Lyberth allatut isumaqarpoq:

- Taanna aappaatigut isumalluannalaartutut oqaatigineqarsinnaavoq, kisianni Alcoap taanna pilersaarutiginikuusaa isumalluarfiginikorujussuusarput soorlu oqarnittut ilimanarpallaarunnaartoq, Qeqqata Kommuniani kommunalbestyrelsemut ilaasortaq, Karl Lyberth oqarpoq.