Akuutissaq ulorianartoq kuummat aqqusineq matuneqartoq
Nuummi mittarfimmut aqqutaa ullumi siusinnerusukkut matuneqarpoq, akuutissaq flussyre suliffeqarfimmi LNS Greenland Gemsimi erngarmat.
Rubinisiorfimmeersup Jens B. Frederiksenip nassuiarpaa flussyre annikittuinnaq eqqartorneqartoq. Suliffeqarfiup iluani rubininik saliinermut atasumik akuutissaq natermut kuussimavoq. Taamaattumik sillimaniarnermut malittarisassat malillugit suliaq ingerlanneqarpoq.
AAMMA ATUARUK Nuummi inuussutissarsiortoqarfimmiittut qimarngunneqartut
Rubinit nappartap plastikimik sanaap iluani akuutissami flussyrimiitinneqartarput. Malmi piiarnialugu rubinit akunnerni arlalinni tassaniitinneqartarput.
Uanili nappartaq utsersulaarsimavoq. Taamaattumik LNS Greenland Gemsip sillimaniarnermut malittarisassat malissimavai.
Qatserisarfimmersut suliassaq tiguaat, suliffeqarfiullu matua ammarneqarsimariarmat aalaq aniasimasinnaammat LNS Greenlandip eqqaaniittut qimagussortinneqarput. Anorimut sammisut 150 meterisut ungasitsigisoq angullugu, assumullu sammisut 50 meterisut qimagussortinneqarsimasut Jens B. Frederiksen oqaluttuarpoq.