Akuunerulersitsiarnermut aningaasaliissutissat isumaqatigiissutigineqartut
Folketingimi partiit tamarmik, Enhedslisten minillugu, satspuljemit aningaasaliissutit agguataarneqarnissaat pillugu, Danmarkimi nalunaaqutaq malillugu, ippassaq unnukkut isumaqatigiissuteqarput. Aningaasaliissutit 607 millionit koruuninik aningaasartaqartut Danmarkimi isumaginninnikkut suliniutinut agguaanneqartussaapput.
Kalaallit Illuutaasa akuulersitsiniarnermut suliniutaannut katillugit 8 millionit koruuninik aningaasaliinissamik isumaqatigiissutigineqartoq, Folketingip aningaasaaqarnermut ataatsimiititaaliaanit upernaaq manna akuersissutigineqarpoq. Aningaasaliissutit marloriarlugit tunniunneqartussanngortinneqarput, ukiormanna 4 millionit koruunit aappaagulu sinneri tunniunneqassallutik.
Folketingimulli juunip qaammataani qinersisoqarnerata kingorna, aappaagu 4 millionit koruuninik tunniussisoqassanersoq nalornisigineqalerpoq. Tamannalu pisussanngortoq satspuljemit aningaasaliissutit pillugit isumaqatigiissuteqarnermi naqissuserneqarpoq.
Kalaallit Illuutaasa kalaallit Danmarkimut nooqqammersut ikiorserneqarnissaannut tamarmik immikkut sunik suliniuteqarniarnerlutik danskit isumaginninnermut ministereqarfiannut qanittukkut nalunaarutigaat. Ilaatigullu tassaapput tapersersorteqartitsinissamik suliniutit, kalaallit arnat amerlanerusut sulilernissaannut ikiuinissaq aammalu tarnip pissusianik ilisimasalimmik oqaloqateqarnissamut neqeroorutit.
