VIDEO Akunnaami saarulliit tarajortikkat tunisassiarinerat suliffissaqartitsisoq

Akunnaami, Aasiaat pingisaaniittumi, tunitsivik nipisat suffinerisa nalaani tunitsivigineqaqqissinnaalernermi kingorna maannakkut saarullinnik tarajortikkanik tunisassiulersimasoq alakkarterparput.

Akunnaap talittarfiani tunisisut karsinik niooraaleruttorput. Sulisullumi aamma ulapputissaqarput.

- Tassa ikannerpaangatta qulaaluat, quliusarpugut, Peter Nielsen, Royal Greenland Akunnaami nakkutilliisoq oqarpoq.

Tunitsivimmullumi tulaanneqarsinnaasut ukiup qanoq ilinera peqqutaalluni nikerartarput.

- Ukioq manna tassa aamma panertulillutalu, sualeralutalu, massakkut tarajorterivugut, Peter Nielsen oqarpoq.

Akunnaami aalisakkanut tunitsivik 2013-mi Royal Greenlandip tigugamiuk ammaqqillugulu, Akunnaami aalisartut illoqarfinnut nunaqarfinnullu allanut tunisiartortarsimagaluartut najukkaminni tunisisinnaanngorput. Tamannalu aalisartut iluarisimaarpaat.

- Tassa ungavarterata maanga tunisisinnaaleratta iluartorujuuvoq. Benzinatunnginnerujuusarpugut, sualummik qavanngaanniik Aasiaakkunnut ingerlakaleraangatta aamma annertooq atortaratsigu. Usingaangatta benzinarujuk atortaratsigu, bundgarnersortoq Lars Olsen oqarpoq.

Akunnaami saarulliit tunisassiarineqalinnginneranni, tunisassiorfeeraq nipisat suaannik tunitsiviusarpoq.