Akitsuusiineq tulluartuusoq Siumut isumaqarpoq

Inuiaqatigiit ingerlanneqarnerat maanna erloqinartorsiorfiusoq eqqarsaatigalugu soormi pinngortitap tunniussinnaasaannik tamanna aningaasalersorneqassanngila?

Taama aperisoq tassaavoq Siumut sinnerlugu Inatsisartuni ilaasortaq, Jens-Erik Kirkegaard. Taama aperinerminut tunngavilesuutigaa, qalerallit qeritiinnakkat nunanut allanut tunisassiarineqartut akitsuuserneqarneri, aalisakkanik tunisassiorfimmit Halibut Greenlandimit aamma sulisitsisut peqatigiiffiannit, GE-mit isornartorsiorneqareersorlu.

Aalisarnermik attuumassuteqartut taama sakkortutigisumik qisuariarneri, Jens-Erik Kirkegaardip paasisinnaallluarnerarpaa. Taamaattorli oqarluni soorunami nunatta pisuussutaanik atuisut aningaasarsiortullu nunatta ingerlanneqarneranut aamma peqataasariartut.

Inuiaqatigiit akeqanngitsumik sullinneqarput

Kirkegaardip eqqaamaqquaa, qaleralik mikisoq nunanut allanut tunineqaraagat taanna kiilumut 60 koruunit missaannik akeqarmat, taassuminngalu akitsuusiineq taamaallaat kiilumut 80 øreqarmat eqqaamaqqullugu. Akitsuut taanna aalisakkanik tunisassiortunit akilerneqarluarsinnaakutsoortoq aamma oqarluni.

- Peqqinnissaqarfiit inuiaqatigiinnit atorneqartarneri akeqanngillat, meeqqat atuarfiini atuartitaasarneq akeqanngilaq taamatullu qaffasissumik ilinniagaqarneq akeqarani. Taamaattumik isumaqarpunga inuiaqatigiit akilesorneqarnerat kikkut tamarmik akisussaaffigisariaqaraat aamma pinngortitap tunniussinnaasaannik niuertut, Jens-Erik Kirkegaard allappoq.

Akitsuutit assigiinngillat

Qalerallit mikisut avammut tuniniarneqarneranni akitsuut kiilumut 80 øriusoq, avaleraasartuut akitsuutaannut 90 øriusumut naleqqiukkaanni, avaleraasartuut avammut tunisassiarineqartarput kiilumut 9 koruunik 11 koruunillu akornanni.

Qalerallillu avataani pisat suliarineqanngitsullu 2 koruunit 50 ørimillu akitsuuserneqartarlutik.