Akit assigiikkunnaarnissaat kinguarteqquaat
Naalakkersuisuni Inatsisartunilu Siumukkormiut akit assigiigunnaarnissaannik inatsisartuni oqallinnissaq kinguartikkallartariaqarpaat qulaajagassat isummaarnissaasa tungaannut.
Siumut Tasiilaq Siumup siulittaasuanut Hans Enoksenimut ammasunik allappoq ilungersortumik qinnuiginerarlugu akit assigiikkunnaarnissaannik inatsisartuni aappassaanik oqallinnissaq kinguarteqqullugu imaluunniit suliassaq unitseqqullugu.
Siumut Tasiilap marlunngornermi oktoberip ulluisa 26-anni ataatsimiinnerminni isumaqatigiissutigaat naalakkersuisut siulittaasuata Siumullu inatsisartuni ilaasortaasa peqatigiillutik oqallinnissamik kinguartitsinissaq unitsitsinissarluunniit aalajangertariaqaraat nalorninartut qulaajagassat tamakkiisumik qulajarneqanngisut suli amerlaqimmata, aaqqissuussinissallu paasisitsiniutiginerani ajunngitsorsiassat pingaarnerutillugit eqqartorneqarsimammata.
Taamaaliorneq illuinnaasiortutut nalilertariaqarpoq, taamalu pipallataavalaarluni kiisalu innuttaasut noqqaanerannut suusupaginninnerulluni, Siumut Tasiilaq isumaqarpoq.
Akillu assigiikkunnaarnissaat taasissutigineqassappat tamanna pisariaqarpoq kiffaanngissuseqartumik partiimillu aalajangersimasumit naqisimaneqarani tarnikkut nalunngeqatiginnissut tunngavigalugu, akuersaaratillu taasisut partiimit aalajangersimasumit immikkukajaaq pissusilersortutut isigineqannginnissaq.
Siumut Tasiilap inassutigaa, aamma Siumut Tasiilaq isumaqarpoq Siumut naalakkersuisuni nukittunerusariaqartoq IA-mut anngaaginnarpallaarneq ingasappallaalermat isumaqalernarluni IA naalakkersuisuni siulittaasuutitaqartoq.
Akit assigiikkunnaarnissaannik siunnersuut sisamanngornermi opktoberip 28-anni pilersaarutit malillugit inatsisartuni aappassaaneerneqassaaq.
