VIDEO Akisuanerit Festivalip nipilertussat saqqummiuppai

Akisuanerit Festival, pileqqaarami Atlantic Music Festivalimik taaguuteqartoq, maannamut ukiuni arlalinni aaqqissuussisareerpoq nipilersortartullu tusaamasarpassuit Nuummut tusarnaartitsiartortittarlugit. Festivali kulturikkut illorsuaq Katuaq suleqatigalugu ukiuni kingullerni ingerlanneqartarpoq.

Festivalimut peqatigitillugu aaqqissuisup Atlantic Musicip nalliuttorsiornera malunnartinneqassaaq. Nipilersuutaarniarfik nunatsinnut tamarmut pilersuisuusoq, minnerunngitsumillu saqqummersitsisarfik, Nunatsinni nipilersornikkut nutaaliorfiunerpaallunilu suliaqarfiunerpaasoq ukiormanna ukiunik 25-nngortorsiorpoq. Festivalimi nipilersortussat aamma arlallit saqqummersitsisarfiup taassuma ataaniipput.

Ukiormanna tusarnaartitsisussat pingaarnerit tasssaapput Danmarkimi rockimik nipilersortartut 90-ikkunni nuannarineqarnerpaasut, Dizzy Mizz Lizzy, taakku singlemik saqqummersitseqqammerput Danmarkimilu tusarnaartitsisaqattaarneri ornigarluarneqartarlutik.

Ulluni sisamani pikkunavimmik festivalerneq
Nipilersoqatigiit Dizzy Mizz Lizzykkut tusarnaartitsinissaannut kissasserneq sisamanngornermi oktobarip aallaqqaataani 90-ikkornisanik aliannaartitsinermik aallarnerneqassaaq. Nuuk Possep, Nunatsinni hip hoppimik nipilersortartut siullersaata Sverigemeersullu 90-kkunni nunarsuaq tamakkerlugu nuannarneqarluartup Dr. Albanip festivali aallartisassavaat.

Aqaguani, tallimanngornermi, aamma nuannisartitsilaavissortoqassagunarpoq. Nipilersoqatigiit sisamat unnuk taanna tusarnaartitsissapput, Mariina, Pilu Lynge, Rikka aamma Zikaza Katuap inersuaani appissapput.

Arfininngornermilu sakkortusaaviit nipittoqqinneqassapput, unnummimi tassani Dizzy Mizz Lizzy appittussaapput.

Tamannali pitinnagu nipilersoriaatsinik indie-rock-pop-disco grungenik kissassaallutik tusarnaartissapput Nanook, Small Time Giants aamma For Akia.

Festivalip naggaserneqarnera - unpluggedimik
Akisuanerit Festival sapaammi oktobarip sisamaani Katuami Hans Lyngep Inersuanut nuussaaq.  

Piggappaammi aqutsisoq nuannarineqarluartoq Hans Jukku Noahsen, "Hans Jukku Show"-imik taallugu quiasaaraluni aliikkusersuissaaq unnuullu sinnerani aliikkusersuisussat tassaapput Nina & Malik,  angajoriit Elsnerikkut, Pilu Lynge, Kimmernaq, Kishima, Asit, Hans Mortensen, Rockstones kiisalu Inuk.

Akisuanerit Festivalip Facebookimi qilanaartutitut videoliaa ataani isiginnaarsinnaavat: