Akisuanerit Festivalimut programmi piareerpoq

Septembarip naanerani Akisuanerit Festival ingerlanneqalerpat appisimaartussat nutaartaqarlutillu ilisimaneqarluartuupput.

Allattoq Hanna Vestergaard Hviid

aggustip 01-at 2023 12:36

Nutserisoq Sussi Jensen

Nuup timersortarfissuani Inussivimmi Akisuanerit Festival 2023 ingerlanneqalerpat inuit nuannannissaat qularnanngilaq.

Ukiut tamaasa pikialaartitsineq nipilersortartut nuannarineqarluaqisut Nuummukarnissaannut pilerilersitsisarpoq - aammattaaq ukioq manna.

Akisuanerit Festival 2023-mi appittussat

Tallimanngorneq septembarip 29-iat:

- Siissisoq

- Kalak

- Rockstones

- Inneruulat

Arfininngorneq septembarip 30-iat:

- Jens Kleist

- Tessa

- Sauwestari

- Wafande

- Pharfar

- Kaka

Imigassartaqanngitsumik aaqqissuussaq, arfininngorneq septembarip 30-iat:

- Sauwestari unplugged

- Jens Kleist

Allisiguk

Akisuanerit Festival nipilersuutit rockit aallarniisoralugit septembarip 29-ianni aallartinneqassaaq. Nipilersortartut ilisimaneqarluartut saqqummeqqammertullu appisimaartussaapput, ukiorpassuarnilu nipilersoqatigiit Siissisukkut nalunaarnikuupput naggammik appisimaartussaallutik.

Arfininngornermi nipilersuutit hiphopimut nuussapput, tassani ilaatigut qallunaaq nipilersortartoq nuannarineqarluaqisoq Tessa appisimaassaaq. Akisuanerit Festivalimilu siullerpaamik reggaemik nipilersortoqassaaq, tassami nipilersoqatigiit Sauwestarikkut appisimaassammata.

Aamma atuarukJulie aamma Mø Akisuanerit Festivalimi peqataalersut

Unnunni taakkunani marlunni nuannataarnerit nalunaaqutaq 21 aallartissapput unnuallu tungaanut ingerlanneqassallutik.

Sauwestari unplugged aamma Jens Kleist illoqarfiup innutaasuinut inuusunnerulaanut 18-it inorlugit ukiulinnut ilaqutariinnullu aaqqissuussami appisimaassapput.

Tamanna imigassartaqanngitsumik ingerlanneqassaaq isernerlu akeqassanngilaq, arfininngorneq septembarip 30-ianni nalunaaqutaq 15 aamma 16 akornanni ingerlanneqassaaq.