Akilinermi arnaq naggueqaterput inuartarineqarsimasoq nassaarineqarpoq

Nunatsiavumiut neriuutigisimanngikkaluarpaat oqaluttuaq taama inerneqassasoq.

Sapaatit akunneri marluk qaangiupput arnaq inuusuttunnguaq Nunatsiavumiu Loretta Saunders periafeerunneqarmat. Taanna Halifaxip ilisimatusarfiani ilisimatusartuuvoq.

Ilisimaneqarpoq naggueqatitta indianerillu arnartarpassui periafeerunneqartarnerat, tamakkulu ilisimatusarfiginiarlugit Loretta Saunders aallartissimagaluarpoq. Ajornartorsiut pillugu soraarummeerutissani suliaralugu aallartissimavoq majimilu ilinniarnini naammassisussaagaluarlugu.

Timmisartumut billetit Kalaallit Nunaanitulli akisutigaat. Taamaattumik aningaasanik katersisoqarpoq ilaqutaasut arlaqartut Halifaximut ujarleriartoqataaniassammata. Unnuakuttaaq ikumatitalisaarluni ingerlaaqatigiinnermut peqataapput.

Ullumikkulli pilitiit nalunaarput Lorette Saundersip timaa nassaarineqarsimasoq.

Toqunneqarsimavoq, timaalu biliniit aqqusinersuup sinaanut inginneqarsimalluni. Nassaarineqarfia New Brunswick Halifaximiit 3 tiiminik biilinik ingerlasarialimmiippoq.

Ilaqutaasut maanna Lorette Saunders naartualu qaammatinik pingasunik utoqqaatigilersoq aliasuutigeqaat. Anaananngortussaagaluaq 26-iinnarnik ukioqalerpoq.

Inuunerminut nuannersumut aggersumut taarsiullugu, maanna Inuit arnartaasa toqutaasimasut kisitsisit atorlugit nalunaarsorneqarfiannut tujorminartunut ilannguppoq.