Inuussutissarsiutit

Akileraarutit akitsuutillu Naalakkersuisunit Sulisitsisunillu misissoqqissaarneqassapput

Inatsisiliornerup inuussutissarsiutinik ingerlataqartunut siunertarinngisanik kinguneqartitsisarnera suliassanik annaasaqartoqarneranik imaluunniit aningaasatigut isaatitsinikinnerunermik kinguneqarsinnaavoq.

Allattoq Inge S. Rasmussen, Nauja Møller

juunip 29-at 2015 10:29

Taamaammat Naalakkersuisut aamma Sulisitsisut, GE, peqatigiillutik suleqatigiissitanik suligasuartussanik pilersitseqqammerput, taakkulu akileraartitsinermik akitsuuteqartitsinermillu suliassaqarfimmi inuussutissarsiornermut tunngasutigut inatsisinik misissuisuussapput, aningaasaqarnermut naalakkersuisoq Andreas Uldum Sulisitsisullu pisortaat peqatigiillutik tusagassiorfinnut nalunaaruteqarlutik taama allapput.

Suleqatigiissitaq allaanerusumik suleriaaseqassasoq taakku aamma oqaatigaat:

Assersuutigalugu sammisamut aalangersimasumut atatillugu suleqatigiissitap quppernerpassualimmik nalunaarusiamik tunniussaqarnissaa anguniagaanngilaq. Paarlattuanik ukiormanna siunnersuutinik piviusunik imalimmik katalogimik saqqummiussaqassaaq.

Aamma atuaruk 2015-imut aningaasanut inatsit Partiit oqaluuserisassaat

Aningaasaqarnermut Naalakkersuisoqarfimmit aamma Sulisitsisunit sinniisuutitat saniatigut suleqatigiit inunnik inuussutissarsiorfimmi inatsisaasunik aningaasaqarnermillu pissutsinik immikkut ittumik ilisimasaqartunik, soorlu inatsisilerituunik aamma kukkunersiuisartunik suleqateqartassapput.

Pingaaruteqartutut isigineqartillugu SIK kattuffiillu allat aamma ilaatinneqartassasut illuatungeriit neriorsuutigaat.
Suleqatigiinni avataanit peqataasut suliaminnut atatillugu akissarsiaqassanngillat, allaffissornermullu tunngatillugu sullissineq Aningaasaqarnermut Naalakkersuisoqarfiup aningaasaqarnermigut sinaakkutigisaasa iluaniissalluni.