Ajorsarneq akisooq
Piareersimanngitsuuallannerit marluk Rhodosimiut atorluarmatigit Kalaallit angutit arsaattartut 2-1-mik ajorsarput. Kalaallini isertitsisuuvoq Norsaq Lund Mathæussen.
Piffissaq ingerlatinniarlugu 1-0-mik kinguarnermik kingorna Rhodosimiut suut tamaasa arriitsuararsuarmik aallartinniaruusaartarpaat.
- Kisianni uagut isumaqatigiippugut tamanna eqqarsaatigivallaarniarnagu arsarnerpullu nakkutigilluaannarlugu, kalaallit sungiusaasuat Tønnes O.K. Berthelsen taama KNRimut oqarpoq.
Kisianni tassa puljeni ajugaasut kisimik ingerlaqqittussaammata ajorsarneq taanna pissutigalugu kalaallit ingerlaqqinnissamut periarfissaat ajornakusoortorujussuanngorput.
Sulorarnermi aallartilluarput
Sulorarnermi nunanut allanut unammisartut holdikkaarnermi semifinalemut ingerlaqqipput unamminerni aallarniutaasuni Gibraltar aamma Jersey ajugaaffigereerlugit. Semifinalemi unammissavaat Isle of Man. Ilimanarpoq finalemi Savalimmiut unammeqqikkumaaraat taakkuuppullumi ukiut marluk matuma finalemi kalaallinut ajugaasut.
Ajoraluartumik nerrivimmi arsaarartartut aallartilluarpallaanngillat holdikkaarnermi Åland aamma Menorca ajugaaffigigamikkit. Taamaasilluni kalaallit ujaminnannissaat ilimanarpallaarunnaarpoq.
Volleyballimi aamma aallartilluarpallaanngillat. Arnat Menorcamut 3-0-mik ajorsarput sætini kisitsisitaralugit 14-25, 17-25 aamma 23-25. Angutit Cayman Islandsimut ajorsarput 3-1-mik sætini kisitsisitaralugit 23-25, 25-21, 21-25 aamma 22-25.
