Air Iceland: Qaqortumi mittarfiliortoqarnissaq pisariaqartinneqanngilaq
Narsarsuarmi mittarfik matuneqassaaq atorneqarneraluunniit minnerulersinneqassalluni. Naalakkersuisut tamanna siunnersuutigaat. Imaanngilarli tamanna Islandimiut timmisartuutileqatigiiffiata Air Icelandip kissaatigisimagaa. Taakkumi mittarfiit Nuummiittup aamma Ilulissaniittup tallineqarnissaat neriuutigaat, Qaqortumilu nutaamik mittarfiliortoqarnissanik pisariaqartitsoqanngitsoq oqaatigalugu.
- Paasisakka naapertorlugit mittarfiliariniarneqartoq Narsarsuarmi mittarfimmit naannerusussaavoq. Taamaalilluni Narsarsuarmit killeqarnerussalluni immaqa aamma silamut tunngasut sunniuteqaqataassapput, Air Icelandip pisortaa Arni Gunnarsson oqarpoq.
Taamaattumik Islandimiut timmisartuutileqatigiiffiata kalaallit politikeriinut oqariartuutaa erseqqarilluinnarpoq.
Kitaani ingammik Nuummi Ilulissanilu mittarfiit tallineqarnissaat kissaatigaarput, Air Icelandip pisortaa oqarpoq.
Aamma atuaruk Qaqortumi mittarfiliornissaq pillugu nalunaarusiaq isumallualersitsinngilaq
Mittarfiit naanneri patsisigalugit timmisartoq 37-nik issiavilik taamaallaat 33-nik ilaasoqarsinnaavoq. Taamaattumik timmisartoq ulikkaarluni ilaasoqartaruni imminut akilersinnaanerussaaq.
Pisortap ilanngullugu tikkuarpaa, Air Iceland ukiup matuma ingerlanerani timmisartunik nutaanik Q400-nik timmisartuutitaartussaammat. Taakku sukkanerusumik timmisarput ilaasunullu 70-inut inissaqarlutik.
- Mittarfiit tallineqarsinnaappata timmisartuutivut atorluarnerussagaluarpavut, allaammi immaqa timmisartunik annerusunik soorlu Q400nik, ukiormanna kingusinnerusukkut atuligassatsinnik angallassisinnaassagaluarluta. Taakkumi mittarfinni tannerusuni atorsinnaassavavut, taamaalillutami eqaannerusumik akikinnerusumillu timmisartuussisinnaassagaluaratta.
Arni Gunnarssonip nassuiaatigalugu oqaatigaa Kujataani illoqarfimmut pineqartumut qaninnerusumi mittarfiliortoqarniarnera paasisinnaalluarini, innersuussutigerusutaali paatsuugassaanngilaq.
- Aningaasat atorneqarsinnaasut killeqartillugit pingaarnersiuinermi mittarfinnik talliliinissaq pingaartinneqarnerusariaqartoq isumaqarpunga, Arni Gunnarsson naggasiivoq.
