ASSIT Air Greenlandip timmisartup katatai nassaarigai
Nunarsuarmi timmisartut annersaanni Airbus A380-imi issimasut Parisimit Los Angelesiliartillutik tupassimassapput, timmisartummi motoriata ilaata motorimit kaanngarluni nakkarnera takugamikku tupassimassaqaat.
Ilaasimasut 497-it inuttallu 23-t 11 kilometeritut qutsitsigisumi ingerlaartillutik motorip ilaa tassanngaannaq kaanngarpoq. Nunat assigiinngitsut nutaarsiassaqartitsivii taama allaaserisaqarput.
Timmisartoq Canadap avannarpasissuanut Goose Bayimut taava sangutinneqarpoq, timmisartoq isumannaallisaaneq pillugu tassani nunnilluni.
Timmisartup ajutoornera franskit ajutoortoqarsimatillugu misissuisartuinit BEA-mit misissorneqassaaq.
Ajutoortoqarsimatillugu Danmarkimi misissuisartut aamma peqataassapput, timmisartullu ilaata nassaarineqarnissaa pillugu Air Greenland ikiortiserineqarluni.
Air Greenlandimi sulisut ilaat timmisartup motoriata ilaa pingasunngormat sumiissusersivaat, Paamiunit kujammut kangisissumi 150 kilometeritut ungasitsigisumiittoq nassaarineqarluni.
- Timmisartup ingerlaarfia, qutsissusia, anorillu sakkortussusaa misissoqqissaarpavut, tamannalu tunuliaqutaralugu sumiissusersillugu, Martin Puggaard, Ajutoortoqarsimatillugu Danmarkimi misissuisartuneersoq KNR-imut oqarpoq.
Air Greenlandip qulimiguuliutaa AS350 atorlugu timmisartup motoriata ilaa nassaarineqarpoq. Sinnerili suli nassaarineqanngillat, silallu nakkarfiup nalaani pitsaavallaannginnera pissutaalluni.
