Air Greenland pisortartaassaaq

Timmisartuutileqatigiiffiiup Air Greenlandip maanna nalunaarutigaa, timmisartuutileqatigiiffimmi aqutsisut allanik taarserneqassasut. Timmisartuutileqatigiiffimmi siulersuisut maanna nalunaarutigaat, Air Greenlandimi pisortaaneq allamik taarserneqassasoq.

Pisortaanerup Michael Højgaardip atorfini taamaasilluni qimattussanngorpaa.

Højgaardip atuuffimminit sooq suliunnaassanersoq erseqqissaatigineqanngilaq, aqutsilluarnerarsimalluguli siulersuisuni siulittaasup Søren Lennert Mortensenip oqaaseqarfigaa.

- Michaeli angusanik pitsaasunik tunniussaqarpoq, tamannalu aamma niuerfimmi unammilligassaqarfiusumi iluatsittumik pivoq. Suliffeqarfiup kaaviaartitaasa aamma ingerlatsinermi angusaasa pitsaanerpaartaat 2016-imi takuagut, tamannalu suliffeqarfiup pisariillisarneqarnerata aamma niuerutigisanik ineriartortitsinerup kingunerisaanik anguneqarpoq.

Søren Lennert Mortensen taama allappoq.

Michael Højgaard pisortaajunnaarnera soraarsitsinerunersoq paasiniarlugu Søren Lennert Mortensen KNR-imit attavigaarput. Taasumalli soraarsitsinertut taarusunngilaa. 

Pisortaq soraarsippisiuk?

- Michaelip ukiuni sisamani sulisimanera ajorisassartaqanngilaq. Siunissamili unammilligassat nutaat eqqarsaatigalugit siulersuisut aalajangerput nutaamik pisortartaarnissaq pisariaqartoq. Tamannalu Michael Højgaardip isumaqatigineratigut pivoq, Mortensen oqarpoq. 

Sooq massakkut? Tassami suli pisortassamik nassaanngilasi.

- Pisortamik nutaamik nassaarniarneq ukiup affaanik sivisussuseqarsinnaavoq, Højgaardillu taama sivisutigisumik tigumminiinnarnissaa sivisuallaarpoq, Søren Lennert Mortensen oqarpoq.

Taama oqariartuuteqarnersi siulersuisut soraarsitsinermut oqariartaasaattut nipeqarpoq?

- Sapaatip akunnera naalluariuk, Mortensen naggasiivoq.

Michael Højgaardip suleqatigisimasani oqalugiarnermini aamma qujassuteqarfigai.

- Air Greenland ukiuni arlalinni pisoqarfiusimaqaaq, nuannaarutigaaralu suliffeqarfik suliassaqarfimmik annertuumik ilisimasaqarfiusoq aamma tunniusimalluartunik sulisulik siuuttuuffigisinnaasimagakku. Peqatigiilluta angusanik pitsaasunik tunniussaqarpugut, unammilligassanillu allanik ujaasinissaq uannut piffissanngorpoq, Højgaard oqarpoq.

Michael Højgaard Air Greenlandimi suleqataareerluni pisortaanertut 2013-imi atorfinippoq. 1994-imiit 1998-ip tungaanut teknikeqarnermut pisortaavoq, kingornalu timmisartuutileqatigiiffiup niuernikkut ingerlatsineranik akisussaasuusimalluni. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!