Agner Mark: Tunuarnera suleqatigiilliornermut tunnganngilaq
Stine Bosse Tele-Postimi siulersuisuni siulittaasunngorpoq.
Agner Mark 2011-imili siulersuisuni siulittaasooreersup akisussaaffii taassuma maanna tiguai.
- Martsip aallaqqaataaniit suliffeqarfissuarmi 3000-inik sulisoqartumi sulilerpunga, inissisimaninnullu tulluartuusimanngilaq.Taamaammat tunuarnissara pisariaqartissimavara. Qaammatialuillu qaangiupput aningaasaliisartunut nalunaarama, Agner Mark aalajangernini pillugu oqarpoq. Ukiut kingulliimmi Agner Mark siulittaasutut sullissinera isornartorsiorneqangaatsiartarpoq.
Aamma atuaruk Agner Mark Tele-Postimit tunuarpoq
Agner Markilli suleqatigiinniarnikkut ajornartorsiuteqarsimanernut isornartorsiuineq tunuarnerminut pissutaannginnerarpaa.
- Naamik, taanna pissutaanngilaq. Oqareernittuut allanik tunngaveqarpoq, Agner Mark oqarpoq.
Nutaarluinnarmilli siulersuisoqalissaaq
64-inik ukiulik Stine Bosse aamma apriilimi Nunaoilimi siulersuisuni siulittaasunngortup saniatigut siulersuisuni ilaasortanngorput TDC-imi teknologimut tunngasunut pisortaq Kim Søgård Kristensen, inatsisileritooq eqqartuussissuserisoq Ulrik Blidorf, aammalu Arctic Winter Games 2016-imi pisortaq Maliina Abelsen.
- Pingaarutilinnik suliassaqarpugut, nutaamik suliffeqarfiup pisortassaanik toqqaasoqassaaq, namminersortunngorsaaneq sulissutigineqartussaavoq aammalu qanoq ineriartortitsinissaq sulissutigisussaallutigu. Aamma taakku saniatigut nordvestimut tunngasunut aningaasaliinerit aningaasanillu atornerit eqqartorneqassapput. Saniatigullu suliassat annertuut ingerlatissavagut, siulersuisuni ilaasortanngortoq Maliina Abelsen oqarpoq.
Siulersuisuni siulittaasunngortoq Stine Bosse Tele-Postip ataatsimeersuarnerani ullumi peqataanngilaq.
Siulersuisuni siulittaasup tullia suli qinerneqanngilaq, siulersuisulli ataatsimiinnerani siullermi tamanna aalajangiiffigineqassaaq.
Aamma atuaruk Stine Bosse Tele-Postimi siulittaasunngortoq