AG: KNR-ip aningaasat unioqqutitsisumik isertitani utertittariaqarpai
AG-p aaqqissuisuata pingaarnertut allaaserisaani tamanna ilaatigut atuarneqarsinnaavoq.
KNR-ip pilerisaarutinik nittartakkamigut saqqummiussisarsimanera isornartorsiuinermut tunuliaqutaavoq.
KNR-ip nittartakkamigut pilerisaarutinik saqqummiussisarnera Kultureqarnermut Naalakkersuisoqarfimmit sapaatip-akunnerata siuliani unitsinneqarpoq, KNR-ip taamaaliornera inatsisinik atuuttunik unioqqutitsinertut nalilerneqarluni.
AAMMA ATUARUK KNR.gl-imi pilerisaarutit peerneqarput
KNR-ip nittartagaatigut saqqummersinneqartartut "programminik aallakaatitsinertut" taaneqarsinnaanngitsutut nalilerneqarput, taamalu ussassaarutinik tuniniaanikkut isertitat atorlugit ingerlatsisinnaanani.
KNR-ip nittartagaa "programminik aallakaatitsinertut" KNR-ip pisortaanit Søren Lennert Mortensenimit nalilerneqarpoq, AG-mullu ima oqarluni:
- Naalakkersuisoqarfiup qinnuteqaataa soorunami malissavarput, inatsisip qanoq paasineqarnissaa isumaqatigerpianngikkaluarlutigu, KNR-ip pisortaa oqarpoq.
AAMMA ATUARUK Tusarnaartartut inuusuttuunerusut KNR-ip sullinniarpai
KNR-ip siulersuisuini siulittaasoq Nukâraq Eugenius AG-mi ima issuarneqarpoq:
- Unammillernermik oqalukkaangatta tamatigut nalorninartoqartarpoq. Tassami inatsimmi ersarissumik allassimanngilaq suut unammillernermik equtitsinerunersut. KNR-ilu aammalu Naalakkersuisoqarfiup qularnaarlugu oqaatigisinnaanngilaat killissaa sumiinnersoq, Nukâraq Eugenius oqarpoq.