Aavaakkut dronningi erinarsorfigissavaat
Tusarnaartitsineq siulleq Københavnip Rådhusiani januaarip 14-iani pissaaq, aqaguanilu Christiansborgip oqaluffiani naalagiarnermi aamma tusarnaartitsissallutik.
Aavaakkormiut Kalaallit Nunaat sinnerlugu taamatut kiinnersinnaanertik tulluusimaarutigeqaat:
- Tulluusimaarnaannarani misigisaq uatsinnut assut angisuujuvoq, Aavaakkut siulittaasuat Carsten Siegsted oqarpoq.
Aavaakkunni erinarsortartut 36-t Københavnip Rådhusiani tusarnaartitsilerunik erinarsoqatigiit Danmarkimeersut Savalimmiuneersullu katillugit 500-t erinarsoqatigissavaat. Aqutsisoq nuannarineqaqisoq Frans Rasmussen aqutsisoralugu erinarsuutit marluk atussavaat, tassaasut " I Danmark er jeg født" aamma ”Den danske sang". Taamaasillutik Aavaakkormiut perngaammik qallunaatut erinarsussapput.
Københavnip rådhusiani nalliuttorsiornermut atatillugu dronning Margrethe uinilu prins Henrik rådhusip aneersuartarfianut anillassapput.