Aatsitassarsiornermi Aningaasaateqarfimmit aalajangersimasumik atuisarnissamik siunnersuut ingerlateqqinneqarpoq
Siunnersuut isikkumisut akuerineqanngikkaluarluni ataatsimiititaliamut ingerlateqqinneqarpoq.
- Uani aalajangigassami pissusissamisoornerpaamik ujartuigatta, taamaammat uterteqqaarallarparput. Itigarteriarlugu allannguutissamik siunnersuuteqassaagut. Isumaqanngilanga illua'tungereerujussuartugut, kisianni pitsaanerpaaq anguniarlugu suliaqarusukkatta itigartitsigallariarluta allannguutissamik siunnersuutissamik saqqummiussissaagut, Aningaasaqarnermut Aatsitassanullu Naalakkersuisoq Andreas Uldum oqarpoq.
Aamma atuaruk Aatsitassarsiornermi Aningaasaateqarfimmit aalajangersimasumik atuisarnissamik siunnersuut itigarteqquaat
Siunnersuutip Inuit Ataqatigiit sinnerlugu Inatsisartunut ilaasortamit Naaja Nathanielsenimit qaqinneqartoq, aatsitassarsiornermi aningaasaateqarfimmi aningaasat erniaat kisiisa tiguneqarsinnaassasut siunertaraa.
Nunarput aatsitassanit 10 millionit koruuninik ukiut marluk ingerlanerini isertitaqaqqaartareerpat aningaasaateqarfik aatsaat pilersinneqassasoq, siunnersuutip aamma siunertaraa.
Aamma atuaruk Aatsitassarsiornermi Aningaasaateqarfik oqallisigineqaqqilersoq
Siunnersuusiortullu aatsitassarsiornerup iluani aningaasarsiat sianigineqarnissaat pingaartippaa.
- Nunarsuarmi aatsitassarsiornermi aningaasaateqarfiit pillugit misilittakkat tunngavigaagut. Nunat, ingammillu Afrikami nunat, aatsitassarsiornermi aningaasaateqarfeqannginnertik pissutigalugu aatsitassarsiornermi aningaasat pissarsiatik atupiluttareerlugit ullumi ajornartorsiortut takusinnaavagut, Naaja Nathanielsen oqarpoq.
Siunnersuut Inatsisartut Aatsitassanut Ataatsimiititaliaannut innersuussutigineqartoq Naaja Nathanielsen nalunaarpoq.
Siunnersuut pilersaarutit naapertorlugit marsip ulluisa 27-anni aappassaaneerneqassaaq.