Aatsitassarsiornermi Aningaasaateqarfimmit aalajangersimasumik atuisarnissamik siunnersuut itigarteqquaat
Naalakkersuisummi tikkuarpaat Naalagaaffiup Nunatsinnut tapiissutai ilanngartorneqalertussaasut Nunatta aatsitassarsiornermit isertitai 75 million koruunit sinnerpagit.
Taamaammat Inuussutissarsiornermut Aatsitassanullu Naalakkersuisoq, Jens Erik Kirkegaardi, isumaqarpoq Aatsitassarsiornermi Aningaasaateqarfiup isertitassaanit ukiumut qassit atorneqartassanersut siumoortumik aalajangersaavigineqarsinnaasoq.
- Aningaasaateqarfimmiittussat qanoq amerlatigilissanersut naluarput aamma aningaasaliinissamut periarfissat suussanersut naluarput, Jens Erik Kirkegaard itigartitsinissamut siunnersuuteqarnermini ilaatigut taama allappoq.
Aatsitassarsiornermi Aningaasaateqarfimmi ullumikkut aalajangersagaasut Jens Erik Kirkegaardip ilaatigut innersuussuteqarfigai. Aningaasateqarfimmi massakkutut itsillugu Namminersornerlutik Oqartussat aatsitassiornermi aningaasaliinernut, oqartussaaffiit angerlaassuunneqartut aningaasalersornerannut Naalagaaffiullu tapiissutaasa ikilisinnerini taartitut atorneqarsinnaasutut uninngasuutigineqalersussat ammatinneqarput.
Assersuutigalugu aalajangersaasoqaraluarpat aningaasaateqarfiup aningaasaataasa annerpaamik 20 %-ii imaluunniit 30 %-ii atorneqarsinnaasut, ataatsimoortumik tapiissutit annikillisinneqarnerannut taarsiissutissaqannginneq pissutigalugu aningaasanut inatsimmi aningaasartuutit, assersuutigalugu napparsimavinnut, atuarfinnut il.il., annikillisinneqartussanngornerannik tamanna kinguneqarsinnaavoq, Jens Erik Kirkegaard ilaatigut taama mianersoqqusivoq, Aatsitassarsiornermili Aningaasaateqarfik maannakkutut itsillugu siunertarineqartut pitsaasuusut isumaqarluni:
- Siunissami kinguaassatsinnut ileqqaassaagut, aamma aningaasat maannakkorpiaq pisuussutinit killeqartunit pigisavut atuinnassanngilagut. Peqatigisaanik paasisariaqarparput inuiaqatigiit aningaasaqarnerannut piffissamut ungasissumut tunngavissarititaasunut killissaliussat pitsanngorsassagutsigit aamma nammineerluta aatsitassarsiornermik suliaqarnermi aningaasaliinerni peqataasinnaassagutta, tamatumani aningaasaateqarnissaq pisariaqarmat, taakkualu suli piginngilavut. Tamannarpiaq pissutigalugu aatsitassarsiornermi aningaasaateqarfimmit aningaasat siunertanut taakkununnga atorneqarsinnaapput.
Naaja Nathanielsenip Inatsisartut ukiaanerani ataatsimiimmata siunnersuutigigaluarpaa Aatsitassarsiornermi Aningaasaateqarfiup aningaasat uninngasuutiminit iluanaarutai kisimik atorneqartassasut. Kisianni Inatsisartuni amerlanerussuteqartut siunnersuutaa aamma ullumikkutut ilalinngilaat.
