Aatsaat taama sinneqartoortigaat
Suliffeqarfimmiit tusagassiutinut nalunaarummi allassimavoq, 2011 immikkut pisoqarfiusimasoq, nutaanik sanaartortitsisoqarnera, aamma umiarsualiviit allineqarnissaat qitiutinneqarlutik.
Ingerlatsinermi uuliamik ujaasinerup umiarsualivinni arlalinni annertunerusumik ingerlatsineq kinguneraa, tamatumunngalu ilaavoq Nuummi annertuumik sanaartorneq, tamakkulu naatsorsuutitigut patajaatsumik angusaqarnermut iluaqutaapput.
Ukioq 2011 suliffeqarfissuarmut immikkut ittuuvoq, umiarsuit pisoqaasut nalikillilerneqarnerat malunnaatilimmik appasimmat. Naleraq 2015 - Royal Arctic Line-ip siunissamut pilersaarutaa - ilanngullugu, aamma usit assartorneqartut pitsaasumik ineriartornerat, Royal Arctic Line-ip manna tikillugu pitsaanerpaamik aningaasatigut angusaqarneranut tassaapput pissutaasut.
Uuliasiornermut tunngatillugu, 2012-imi killilimmik ingerlatsisoqarnissaanik tusarliussisoqartarnera, aamma umiarsuarnik nutaanik nalikillilersuinerup aallartinnissaa pissutaallutik, aningaasatigut angusat ukiuni qaninnerni aggersuni annikinnerussapput.
- Siunissamut pilersaarutip iluaqutaaneranik takutitsisimasoq, aamma sulisut ilumoorlutik pitsaasumillu iliuuseqartut iluaqutigalugit ingerlatsivik unamminartunut aggersunut piareersimalluartoq uagut qularutiginngilarput, siulersuisunut siulittaasoq, Martha Labansen, aamma pisortaaneq, Jens Andersen, tusagassiuutinut nalunaarumminni taama allapput.