Aasiaap toqunartullip arnaq Aasianni napparsimavimmut unitsikkaa
Malina Clasen Aasiaat Radioani sisamanngornermi unnukkut sulitilluni bananilerlugu qallersuusiussalluni talimigut tassanngaannaq sakkortuumik kapitilluni malugaa. Malinap aasiammik kiitilluni erngerluni paasivaa.
- Aasiak nunatsinneersuunngitsoq ingerlaannaq takusinnaavara nunatsinnimi kapitittumik tusarnikuunnginnama, Malina Clasen KNR-imut oqarpoq.
Annilaarnermik pissiutaa nilliavoq. Talialu erngerluni pullalerpoq, Aasiannili napparsimmavik akunnerup ataatsip qaangiunnerani aatsaat attavigaa erngerlunilu aaneqarpoq.
Malinap bananitugassaralua pilersuisumi pisiaavoq, taamaammat aasiaap qanoq toqunartoqartiginerata paasinissaa pingaaruteqarmat, banaanip suminngaanneernera paasiniarlugu pisiniarfik pisiortorfillu ingerlaannaq attavigineqarput.
Banaani aasiallu Columbiameersuusut paasineqarpoq tamannalu ajunngitsuuvoq. Aasiammi Argentinameersuugaluaruni imaluunniit Brasiliameersuugaluaruni suli toqunartoqarnerusimassagaluarpoq.
Malinap kapitinnerani timaa malussangaatsiarpoq qujanartumilli Aasianni napparsimmavik nakorsaatissanik piareersimasuuteqarpoq.
- Ingerlaannaq ikiorneqarlungalu nakorsarneqarpunga, taleralu pullakkunnaapallappoq, arnaq 31-nik ukiulik oqarpoq.
Aasianni nakorsaanerup, Ove Ammitzbøllip pisoq oqaaseqarfigerusunngilaa, KNR-imulli oqaatigaa napparsimavik ikiueqqaarnissamut pisariaqartut nakorsaatissallu piareersimatittuaannarai.
Aasiak Aasiaat Radioani suleqatimi suli ujaarigaa, Malina Clasenip oqaatigaa. Qujanartumilli allamik navianaateqanngilaq:
- Aasiaap suussusaa misissulaariaratsigu ataasiarluni kapisereeraangami toqusartoq paasivarput, Clasen oqarpoq.
Taassuma banaanit piffissami qaninnermi attoqqikkallarnianngilai.
- Kingunerlutsitsilaaqqavunga taamaammat banaaninik attuigallarusunngilanga, Malinap oqaatsini quiagalugit illarnissaminullu nukissaqarluarluni oqarpoq.
