VIDEO Aasap alianaaqutinngui takkutereerput

Seqineq, kialaaq alianaassuarlu. Aasaq taamaatsillugu allanik pitsaanerusoqarunanngilaq. Allanngupallassinnaasarporli.

Sila taamaatsillugu, anorsaartinnagu naapitassaajuartartut, ippernat, minitaassanngillat. Soorliuna ippernat kapisineranni ungillerisoqalersartoq?

Ippernat kapisigaangamik enzymemik proteineqartumik aniasitsisarput. Inuillu assigiinngitsuugatta assigiinngitsumik qisuariartarpugut. Taamaattumillu ilaat kiggerlunnerusarput.

Ippernat arnavissat kisimik kapisisarput. Taamaaliortarpullu manniliorniarlutik. Arnavissat ullut 20-t missaannaannik uumasarput, aattoreersimatillutillu 200-t missaannik manniliorsinnaasarlutik.

Inuit assigiinngitsumik tipimik aniatitaqaratta ilaat ippernanut illinnarnerusarput, siunnersuutillu ilagaat eqqiluisaarnissaq, kiagussimatilluni kemikaliat ippernat nuannarilluagaat assigiinngitsut timimiit aniasinneqartarmata.

Silalu kiakkaluartoq salavallaannginnissaq aamma siunnersuutaavoq, tassa timip ilaa kapiteriaannaajunnaarlugu nuisatiinnannginnissaa pisariaqarpoq. Atisat qaamasut aamma atorneqarsinnaapput, ippernat qalipaatit qaamasut takujuminaatsittarmatigit.

Immaqa arlallit tusartarsimagaluaraat baaja ataasinnguaq pisimagaanni ippernat ingalassimatinneqarsinnaasut, ilisimatuussutsikkut misissuinerit takutippaat imigassartorsimatilluni ippernat kajuminnerulersinneqartartut.

Siunnersuutit paasissutissallu misissuinerit inernerinit assigiinngitsunit tigulaariffiginninnerupput.

Unnaaleeqqat aamma takkutereerput, taakkua kapisineq ajorput aattorniartillutilli kiisisarlutik.