Aasaanerani sunngiffimmi Qaasuitsup Kommuniani meeqqanut inuusuttuaqqanullu susassaqarfiit
Aasiaat juunip ulluisa 26-iani 28 tikillugu meeqqat fodboldskolertinneqarsimapput tassani aqutsisuusimavoq peqatigiiffik FC Aasiak.
Juulip ulluisa arfernani Aasianni isikkammik arsarnermi børnecupertoqassaaq tassani avannaamiut Aasiannut unammiariassapput. U12 aamma U14 arsassapput juulip arfernaniit 16-iata tungaanut.
Kiisalu aamma kingusinnerusukkut Håndboldskolertoqassaaq tassani timersoqatigiiffik Norsaq HC aqutsisuussalluni. Taama sunngiffimmi pisortaq Søren Peter Geisler KNR-imut oqaluttuarpoq.
Qasigiannguani katersugaasivik ilaqutariinnut tulluartumik aaqqissuussisimavoq atserlugu Nunaqarfik uumassusilik. Tassani qangatut inuuneq misigineqarsinnaavoq sanaluttunilu peqataasoqarsinnaalluni. Qajartorneq aamma misilinneqarsinnaavoq. Aammattaaq Qasigiannguani aasaanerani meeqqat fodboldskolertinneqartussaapput, tamannalu perusuttunut tamanut neqeroorutaasussaavoq.
Qeqertarsuaq aasaanerani meeqqanut inuusuttuaqqanullu suli iluamik susassaqarfinnik pilersaaruteqanngilaq ukiorli kingulleq skateboardinut rampetaarsimanertik pissutigalugu ukioq manna niaqorutinik agguaaniarput tassanilu makitaasut niaqorutinik pinnassallutik, taamannak agguaanermi grillerinissamik pilersaarutigineqartoq sunngiffimmi immikkoortortaqarfimmi pisortap Simigaq Grønvoldip KNR-imut oqaatigaa.
Ilulissani suli iluamik aasap ingerlanerani pilersaarusiortoqarsimanngilaq.
Nalunngisaqaruit nunaqarfinni illoqarfinniluunniit meeqqanut inuusuttuaqqanullu susassaqarfinnik pilersaaruteqartunut uunga attavigisinnaavatsigut webredaktion@knr.gl
