Aasaanerani sermersuarmi atuartut
Ilinniartuunngorniarnerup kingorna pinngortitamut ilisimatusarnermut soqutiginninnerup annertunerulernissaa tuluttullu pigiinnaasat nukittorsarneqarnissaat aasaanerani atuarnerup siunertaannut ilaavoq.
Aasaanerani atuartitsineq tuluttut ingerlanneqartoq, Sermersuup qaavani 3.300 meterisut qatsitsigisumiittumi ilisimatuussutsikkut misissuisarfimmi Summitimi juulip ulluisa arfineq aappaanni aallartippoq juullillu ulluisa 27-anni naammasineqassalluni.
Atuartut Kangerlussuarmi efterskoleusimasumi atuarput, ilisimatuunillu Kangerlussuarmiittunik ulluinnarni attaveqartarput. Ilisimatuuut Sermersuup aakkiartornera silallu pissusaata allanngoriartornerata naasunut uumasunullu sunniutai misissorpaat.
Atuartut Kangerlussuarmiinnerminni videoliussapput saqqummiunneqarnissaannullu suliaqassallutik. Suliarineqartut atuartut atuarfianni aasaanerani atuanngiffik qaangiuppat atorneqassapput. Aasaanerani atuartut misigisatik pillugit saqqummiussinissaat piumasaqaataavoq, misigisatik atuarfiup iluaqutiginiassammassuk.
