Aarhusimi Kalaallit Illuutaat akeqanngitsumik inatsisitigut siunnersuisoqalerpoq
Kalaallit immikkut siunnersorneqartalernissaanut pissutaasoq tassaaneruvoq, kalaallit immikkut atorfissaqartitaat aallaavigalugit ikiorneqartarnissaat soorlu ilaqutariinnermut ineqarniarnermullu tunngasut eqqarsaatigalugit.
Tamannalu pisariaqartinneqartoq, Aarhusimi Kalaallit Illuutaanni pisortaq, Jørn Holbech oqarpoq.
- Kalaallit Nunaanniit Danmarkimut nuunnermi aningaasat atorfissaqartinneqartupilussuusarput. Nuuttulli ilarpassuisa tamanna takorlooruminaatsittarpaat, tassa danskit oqartussaqarfiini pissutsit Kalaallit Nunaanut sanilliullugit allaanerujussuarmik aaqqissuussaaneri pissutigalugit, soorlu inigisamut akiliinngitsoornermi anisitaanissaq qaninnerusarluni.
- Tassalu ilaatigut tamakku pissutigalugit inatsisitigut ikiorneqarnissaq pisariaqartinneqartarluni, Aarhusimi Kalaallit Illuutaanni pisortaq, Jørn Holbech KNR-imut oqarpoq.
Kalaallit inatsisitigut ikiorneqartarnissaat eqqartuussissuserisunit, Lindhardt Steffensen Advokaterne-kkunit suliarineqartassaaq, ilaatigut eqqartuussissuserisoq, Søren C. Volder ikuuttassalluni. Taanna qanga Namminersornerullutik Oqartussani inatsisitigut oqartussaqarfimmi sulisareerpoq.
Kalaallit Illuutaat Odensemiittoq aamma Københavnimiittoq inatsisitigut siunnersuisarfeqareerput.