Aarhusimi ini kialaarfik kalaallinuinnaq atugassiaq ammarneqartoq
Inili kialaarfik taanna kalaaliunngitsunit ulluni kingullerni 14-ini iserterfigineqaqattaarpoq. Kialaarfiup aqutsisua Morten Aagaard aviisimut Jyllands-Postenimut taama oqarpoq:
- Immikkoortitsinianngilagut, inuillu allat iseqqusaanngissinnaanissaat kissaatiginngilarput, kalaaleqarporli inuuniarnermikkut ajornartorsiuteqartunik. Taakkualu inimut toqqissisimanartumukarsinnaanissaat pillugu ornittagassaannik periarfisseerusuppugut, Morten Aagaard oqarpoq.
Ini kialaarfik allatut inngitsoq
Taassuma Jyllands-Postenimut oqaatigaa ornittagassaq ini kialaarfittut allatut issanngitsoq, kalaallilli ornittagassaattut ammatinneqassasoq.
Init kialaarfiit allat Aarhusimi kikkunnilluunniit orninneqarsinnaasut ammasut, Morten Aagaardip oqaatigaa, inilu kialaarfik kalaallinut ammatinneqartoq ataasiinnaasoq.
Angerlarsimaffeqanngitsut aqqusiniinnarmiittut ikilisikkumallugit
Angerlarsimaffeqanngitsut Aarhusip qiterpasinnerusortaani Klostertorvimiittut ikilisinneqarnissaat siunertaralugu ini kialaarfik Kirkens Korshærimit ammatinneqarpoq, iluatsittumillu:
- Klostertorv eqqarsaatigissagaanni, taava maluginiarneqarsinnaavoq kalaallit inuuniarnermikkut ajornartorsiutillit immaqalu angerlarsimaffeqanngitsut ikilisimasut, ilami takussaajunnaangajassimapput, Morten Aagaard, Jyllands-Postenimut oqarpoq.
Kirkens Korshær, ini kialaarfiup adressiani Spanien 61-imi "Den grønlandske varmestue"-mik taallugu maanna allagartaliissapput, tamaanilu sulisut kajumissaarneqassapput kalaaliunngitsut takkukkaangata ininut kialaarfinnut allanut ornigussinnaanissaannik neqeroorfigisassallugit.
