Aallartoortoqarnera alianartumik kinguneqarpoq
Atuagalliutini ullumi saqqummersuni allaaserineqartumi oqaatigineqarpoq, meeqqat angutaata ernini arfineq marlunnik ukiulik qatanngutaalu niviarsiaqqat marlulissat qulinik ukiullit ilagalugit nunaqarfimmit umiatsiamik aallarsimasut.
Ilaqutariinni ileqqutoqqat naapertorlugit angutaata ernini aallaasersornermik ilinniartissagaa siunertaasimavoq.
Angutaata meeqqani assilissallugit assiliivik tigugaalu, ernerata aallaasip eqittaataa eqittoorpaa, marlulissanilu angajulleq niaquatigut eqqorlugu, aqerlorlu nukarlermut ingerlaqqissimasoq, Atuagalliutini oqaluttuarineqarpoq.
Niviarsiaqqat piaartumik umiatsiamik Aasiannukaanneqarput, tamatuma kingorna Nuummut timmisartuunneqarlutik aqaguanilu Københavnimut Rigshospitaliliaanneqarlutik.
Ilaqutariit oqaatigaat niviarsiaraq angajulleq ippassaq toqusoq, nukarlerli itersimalerluni annaanneqarlunilu.
Pisimasoq politiinit misissuiffgineqareerpoq, niviarsiaqqallu piaarinani aallartoorfigineqartut naliliillutik. Aasianni politiit pisortaat Arne Reimer nittartakkamut Sermitsiaq.ag-mut taama oqarpoq.
