Aallarnissat taamaatikkusuppiuk? Angalatitseqatigiit aningaasanik utertitsisiinnaallutillu allanngortitsisinnaasut
Akiliuteqartitsigani aningaasanik utertitsisoqarsinnaallunilu bilitsinik allannguisoqarsinnaavoq.
Angalatitseqatigiit Disko Line Air Greenlandilu Naalakkersuisut nunatsinni nunanullu allanut angalanissat pisariaqanngitsut sisamanngornermi unitseqqoreeraallu taama neqeroorput.
Nunatsinni oqartussaasut ima inassuteqarput:
- aaqqissuussat inunnit 100-nit amerlanerusunit peqataaffigineqartussat nangaasaarutigineqarluinnarput.
- nunatsinniit nunatsinnullu sapinngisamik angalasoqassanngilaq. Tamanna nunatsinni angalanermut atuuppoq.
- illoqarfinni bussit ilaasunik ulikkaaveqqusaanngillat.
- timersortarfiit, naluttarfiit sutorniartarfiillu isersimasorisinnaasatik affaannaat isersimatittassavaat.
- inuit nunami aarlerinaatilimmeereerlutik nunatsinnut utertut tikinnerminniit ulluni 14-ini tulliuttuni angerlarsimaannaqquneqarput.
- inuit nunami aarlerinaatilimmeereerlutik nunatsinnut utertut napparsimmavinnut, utoqqaat illuinut illuutinullu allanut aarlerinaateqarfiulersinnaasunut ornigutissanngitsut.
AAMMA ATUARUK Innersuussutit nutaat: Nunatsinnit nunatsinnullu angalasoqarnaveersaartoqarli
Kingusinnerpaamik marsip ulluisa 31-anni angalanissamut bilitsisisimasut akiuliutigisimasatik akiliuteqaratik tigoqqissinnaagaat, Disko Linep tusagassiuutinut nalunaarutigaa.
Bilitsisisimasut angalanissartik akiliuteqaratik taamaatikkusuppassuk tamanna angalanissaminnut nalunaaquttap akunneri 24-t sioqqullugit nalunaarutigissavaat uunga allallutik: info@diskoline.gl.
Timmisartornissamut bilitsit allanngortinneqarsinnaasut
Air Greenland aningaasanik utertitsisinnaanngilaq, bilitsinilli marsip ulluisa aqqaneq-aappaata apriilillu ulluisa 20-ata akornanni angalanissanut atuuttuunik allanngortitsisinnaalluni neqeroorpoq.
AAMMA ATUARUK Nakorsaaneq corona pillugu: Peruluttut amerlavallaalissappata unammillernassaaq
Bilitsimik Air Greenlandip nittartagaatigut allannguineq akeqanngitsoq, 701212-imulli sianerluni imaluunniit websupport@airgreenland.gl-imut allalluni allannguineq akeqalaartoq, Air Greenland allappoq.
Disko Line Air Greenlandiluunniit aqqutigalugu angalanissat angalatitsivikkut inniminnersimagukku angalatitsivik inniminniiffigisimasat angalanissaraluannik taamaatitseqqussavat.
