KNR Aallakaatitat nutaat Tallimanngorneq Unnuppaat Man
- Kingullermik ”Tallimanngorneq Unnuppaat Man”-imik allakaatitassiat aallakaatinneqarmata aliikkutassianik nammineq videoliarpassuarnik ilaqarmat iluatsitsilluartorujussuuvugut. Videoliat taamak amerlatigisut tigusimasagut qutsatigeqaagut, ilami amerlassusiat ima tupaallaatigisimaqaarput allaat ukiami 2015-imi aallakaatitassiap nanginneqarnissaa aalajangersimallutigu, TV-mi Aallakaatitassiornermut Pisortaq Jan Berg oqaluttuarpoq.
Tallimanngornerni unnuit tamaasa aammattaaq pitsaasunik eqqugassaqartassaaq. Video amerlanerpaanik taaneqartoq iPad Air 2-mik ajugaatinneqassaaq ajugaaniutivinnermullu ingerlaqqilluni. Aamma tv-kkut isiginnaartartut tamarmik taasinermut atatillugu SMS-imik nassitsisut iPhone 6 nutaanerpaaq eqqornissaanut periarfissaqassapput.
”Tallimanngorneq Unnuppaat Man”-imik aaqqissuisut isiginnaartartunut tamanut kajumissaaripput namminneq quinartunik, nuannersunik aliikkusersuisunillu videoliaminnik aaqqissuisunut nassitsisaqqullugit. Aammattaaq aallakaatitassiat aliikkutassiarpassuarnik allanik neqerooruteqassapput.
- Sulisut aningaasallu amerlasuut atorlugit aallakaatitassiaq kingullermik ingerlanneqarneranut sanilliullugu pitsaanerulersinniarlugulu ineriartortissimavarput. Taamaattumik neriuppugut isiginnaartartut aammattaaq pingajussaanik ”Tallimanngorneq Unnuppaat Man”-ip aallakaatinneqartaleqqinnera nuannaarutigissagaat. Tamatumunnga ilutigitillugu ornigullutik isiginnaarianut tupaallatsitsissutissaqarpugut annertunerusumik oqaatiginianngisatsinnik, aaqqissuisut Simon Løvstrøm aamma Aviaja Rosing oqaluttuarput.
”Tallimanngorneq Unnuppaat Man” tallimanngornerni unnuit tamaasa toqqaannartumik N.U.I.F-immit aallakaatinneqartassaaq, isiginnaariarusukkut uunga mailikkut nalunaarsinnaavutit sml@knr.gl
facebook.com/unnuppaatman-ikkut paasissutissanik pissarsisoqarsinnaavoq sumut aamma qanoq nammineq videolianik KNR-imut nassitsisoqarsinnaanersoq.
Aallakaatitsivimmiissapput Maren-Louise Poulsen Kristensen aamma Kim Jacobsen. ”Tallimanngorneq Unnuppaat Man” siullermik aallakaatinneqassaaq tallimanngornermi nal. 19:30 KNR1-imi.
Paasissutissanik suli amerlanerusunik pissarserusuttut attaveqarfigisinnaavaat aaqqissuisut Aviâja Rosing aro@knr.gl aamma Simon Løvstrøm sml@knr.glimaluunniit telefon 36 15 00