Aallaasit parnaaqqasumiitinnissaat oqallisigineqartariaqarpoq
Taamaaliornikkut aallartoorfigitinnerpassuit nunatsinni pisartut ikilisinneqarsinnaapput, politiit taama isumaqarput.
- Uanilu immikkut ittunik aallaasinut sikaavinnik peqqussuteqartoqarsinnaavoq, aallaasinullumi sikaaviit iluaquutaalluarsinnaasut, politiit pisortaata tullersortaata Viggo Johansenip qularinngilaa:
- Malittarisassaqalissagaluarpata, assersuutigalugu aallaasit parnaarunneqarnissaannut malittarisassaqalissappat, taava iluaqutaasinnaavoq, assersuutigalugu aallaasit inuup allap tiguinnarsinnaajunnaassammagit aammalu/immaqalu unioqqutitsinermut arlaannut atorlugit, Viggo Johansen oqarpoq nangillunilu:
- Ajornartorsiutip ilaanut aaqqiissutaasinnaassaaq.
Aallaasinik tillinnissaq ajornanngippallaarpoq
Aallaasinimmi tillinnissaq ullumikkut ajornanngippallaartoq, politiit isumaqarput.
- Angallatini aallaasit qimaannarneqartartut amerlapput, taavalu aamma angerlarsimaffimmi parnaarunneqarnatik tigummiarineqartut amerlapput taavalu aamma saniatigut pingajuatigullu kinaluunniit aqqaneq-marlunnik ukioqalereersimasoq pisinniarfimmukarsinnaavoq aallaammillu pisiniarluni, Viggo Johansen oqarpoq.
Tamakkulu alianartumik kinguneqartitsisarput:
2016-imi marsip qaammataa: Nukappiaqqat Tasiilap umiarsualiviani angallammi pinnguarneranni qoorortooq aallartoormat nukappiaraq qulingiluanik ukiulik toquvoq.
2014-imi maajip qaammataani: Nunaqarfeeqqami Akunnaami niviarsiaqqat qulinik ukiullit aallartoorfigitipput. Aappaa toquvoq.
2011-imi juunip qaammataani: Niviarsiaraq arfineq-marlunnik ukiulik Tasiilami angerlarsimaffimmini pinnguarnermi aallartoorfigitippoq ikilerujussuarluni.
Nunatsinni aallartoorfigitinnerit qanoq amerlatiginersut politiit oqaatigisinnaanngilaat:
- Eqqoriaaneq, uanga eqqoriaanera imaappoq ukiumut marluk, pingasut sisamariarlutik aallartoortunik pisoqartarpoq, ikilerneqartut imaluunniit toqussutaasinnaasumik, Viggo Johansen oqarpoq.
Aamma atuaruk Politi: Nukappiaraq aallartoorfigitinnermi kingorna toquvoq
Pillaatissiissummik sakkortunerusumik
Taamaattumik politikerit illuliorfigisani silaannarmut eqqaassinermut pillaatissiissut sakkortusineqartariaqartoq, politiini pisortap tullia Viggo Johansen isumaqarpoq.
Aallasersornerit 10-12-it ukiumut pisarput, amerlanertigullu aallaasit tillitat atorneqartarlutik.
Taamaalillutillu illoqarfiup iluani aallaasersortut upalungaarsimasunik ulapputsitsisarput innuttaasunillu tujormisitsisarlutik.
Aamma inuit aallaasinik avatangiiseqartillutik mianersornerusariaqarput. Minnerpaamilluunniit aallaat nikorfaffilerlugu imassaalu allamiitillugit inissillugu.
- Inuiaqatigiinni aamma politikkikkut sulialinni isummersorneq pisariaqassaaq, taavalu aamma inatsisiliortoqassappat politikkikkut aalajangiisoqarluni, taama politiini pisortap tullia Viggo Johansen oqarpoq, taamatullu aallaasit pillugit sukasaanermut tunngatillugu politikerinut suliassiilluni.
