Hans Enoksen: Aalisartut piniartullu sunniuteqarnerussapput
Aalisarnikkut politikkissami aalisartut piniartullu qularnanngitsumik sunniuteqarnerusinnaapput.
Aalisarnermut Naalakkersuisoq Hans Enoksen isumaqarpoq, Pinngortitaleriffimmi biologit aalisarnermut politikki aquttussaanngikkaat.
- Isumaqarpunga biologit kisiisa tunngavigalugit ingerlatsissagutta, taanna pinngortitap inissisimanera eqqarsaatigalugu tulluanngitsoq, Kalaallit Nunaat uumasuusivinngortinneqartariaqanngilaq atuisut tunulliullugit , Aalisarnermut Piniarnermullu Naalakkersuisoq Hans Enoksen taama oqarpoq.
Biologit innersuussutigisaannut Naalakkersuisut maannakkut pituttorsimanngillat, tassami biologit innersuussutigisaat qaangerlugit soorlu saarullittassat innersuussutigineqartut pingasoriaattaannik amerlatigisunik saarullittassiisoqarmat.
Aamma atuaruk saarullittassiissutit-ilaneqarput
- Pinngortitaleriffimmit oqaatigineqartut naapertorlugit biologit innersuussuteqartarnerannut siunertarineqarpoq ungasinnerusoq eqqarsaatigalugu sapinngisamik amerlanerusunik pisaqartoqarsinnaanissaq anguniarneqartarpoq.
- Aalisarneqartussat amerlassusissaanik siunnersuisarpugut, taamaasilluni siunissami aalisagassat raajartassalluuniit ataavarnerusumik amerlassuseqarniassammata, Pinngortitalerimmi biologeq Rasmus Hedeholm ukiup aallartisimalernerani KNR imut taama oqarpoq.
Pisassiissutigineqartut amerlassusiat aalisartut piniartullu aningaasarsiornerannut pingaaruteqartorujussuupput.
Taamaattumik pisassiissutigineqartut annertussusii pillugit aalisartut piniartullu isumaat sunniuteqarnerussasut Hans Enoksen isumaqarpoq, taakkuuppummi pissutsinik ilisimasaqarnerusut Aalisarnermut Piniarnermullu Naalakkersuisoq Hans Enoksen inatsisartuni pingasunngornermi novembarip 16-anni apeqqarissaarfigineqarami taama oqarpoq.
- Pissutsit pitsaanerulissappata taakkua ilisimatuut uagut pigisagut (aalisartut piniartullu aaqqiss. ) taakkua sunniuteqarnerusumik aqutsinermi ilanngunneqartariaqarput, taamaalilluni paaseqatigiissutissagut ilisimasat annertunerujussuussapput Aalisarnermut Piniarnermullu Naalakkersuisoq Hans Enoksen inatsisartut pingasunngornikkut apeqqarisaartoqarnerani akissuteqarluni taama oqarpoq.
