Aalisartoq angerlarsimaffeqanngitsoq: Imaq angerlarsimaffivittut isigaara

- Aalisartutut inuuneq nammineersinnaassuseqarnartorujuugami. Ullaakkut iteraanni silarsuaq nutaaq, pinngortitarsuaq, seqernup nuinera tarrilerneralu. Imaq angerlarsimaffittut isigiuaannarnikuuara.

Aalisartoq angerlarsimaffeqanngitsoq Thomas West Christensen, qimminilu Thyra, tissiartaammi "Beathe Wille"-mi aasaq manna iluarsaassimasamini najugaqartoq taama oqaluttuarpoq.

Tamanna sioqqullugu Avedøre Stationimi Københavnimilu sumiiffinni allani aqqusiniinnarmi sinngup puulerluni inuuvoq, maannali imaanut qanilleqqippoq, tissiartaammi nammineq pigisamini.

13-iinnarnik ukioqarluni umiartulerpoq. Atuarfimmit anisitaanermi kingorna aalisartunngorluni. Raajarniutini mikisuni aallartippoq kingornalu kilisaassuarnut ilaasalerluni. Qaammatini qulini-aqqanilinni angalasarpoq, niugaangamilu kilisaatinut allanut ikiffissarsiupallattarpoq, imarmi taamani maannalu angerlarsimaffivimmitut isigigamiuk.

- Angalaneq naammassigaangat sivisuumik nunamiissinnaaneq-ajorpunga. Aallaqqinniarpallattarpunga, imaanut uterniapallallunga, Thomas oqaluttuarpoq.

Aalisartuunermut uteqqinniarneq ilungersunartoq

Ukiut arfineq-pingasut matuma siorna kilisaammik atlantikukkut Danmarkiliaasseqataavoq, tamatumalu kingorna Danmarkimi feerialaaginnartussaagaluarluni. Sulili Danmarkimiippoq.

Nunatsinnummi uterluni aalisartutut inuussutissarsiuteqaqqilernissaq imaaliallaannaq pisinnaanngitsoq paasivaa. Aalisartunngoqqissagunimi Nunatsinni inatsisit malillugit ukiuni marlunni Nunatsinni najugaqqaarsimanissaq piumasaqaataavoq.

- Danmarkimi ukiuni arlalinni angerlarsimaffeqanngitsutut inooreerlunga Nunatsinnut uteruma ukiut taakku marluk qaangiussiillugit angerlarsimaffeqanngitsutut suliffeqanngitsutullu inooqqittariaqarnissara takorloorsinnaanngilara, Thomas oqaluttuarpoq.

Taamaammat ukiuni kingullerni marlussunni Danmarkimi aalisartutut inuussutissarsiuteqalernissani sulissutigisimavaa. Ukiormannalu iluatsitsivoq aalisariummullu ikilluni. Danmarkimilu aalisariummi pissutsit atuuttut sungiukkuminaatsissimavai.

Kalaallit aalisartut akornanni ataatsimoorneq maqaasisimavaa, tamarmik naligiillutik suliassat suliarisarmatigit. Tamannalu pissutigalugu inuttaaffigisani isumaqatigiinngissuteqarfigalugu angalaneq naammat niuinnarpoq.

Tamannali takorluugaqarnermini unittoorfiginngilaa. Pisortani sullissiviit sivisuumik kimigiiserfiginerisigut pikkorissarnissaminut akuerineqarpoq, pikkorissarnerlu taanna aalisartunngoqqinnissaanut aqqutissiueqataaniartussaavoq.

- Imaani isumannaallisaanermik Thyborønimi imarsiornermik ilinniarfimmi januaarimi pikkorissassamaarpunga. Pikkorissarnerit inatsisitigut piumasaqaataasut allagartaqarfiginngikkaanni imaaliallaannaq Danmarkimi aalisariummi inuttanngortoqarsinnaanngilaq, taamaammat allagartakka isumannaarniarpakka, Erneeraq qujungulluni oqarpoq.

Tamannalu angutserlugu tissiartaataatimini Beathe Willemiissaaq imarsiortunngoqqinnissaminik takorluugaqarluni.