Aalisarneq Savalimmiuni qinersinermi oqallisaaqaaq

Tamannalu Savalimmiuni lagtingimut qinersinermi oqallisigineqartunut ilaalluinnartoq, Savalimmiormiuni Socialdemokraatit sinnerlugit lagtingimut qinigassanngortittoq, Sjudur Skaale oqarpoq.

- Politikkikkut anguniagarput tassaavoq, aalisarnermit piginnittussaatitaaneq Savalimmiuni inuiaqatigiinnit tamanit pigineqassasoq. Aalisarnermik inuussutissarsiuteqarniaraanni tamanna qinnutigineqartassaaq, attartorneqarluni imaluunniit namminersortunut tuniniarneqartassalluni. Taamaaliornikkut aningaasat aalisarnermit isaatinneqartut inuiaqatigiinnut iluaqutaasussanngortassallutik.

Aalisartut ataasiakkaat kisimik iluanaartassanngillat

Savalimmiuni Socialdemokraatit sinnerlugit lagtingimut qinigassanngortittup, Sjudur Skaalep taama oqarnermini eqqarsaatigaa, aningaasat milliardilippassuit aalisarnermit isaatinneqartut inunnut ataasiakkaanut taamaallaat iluaqusiisartut, inuiaqatigiinnut tamanut siunissami iluaqutaalernissaat anguniarneqartariaqarmat, aalisarnermut politikki socialdemokraatinit allanngortinneqarnissaa anguniarneqartoq.

- Ukiuni kingullerni arlalippassuarni takusarparput aalisarnermut piginnittussaatitaanerit inunnut ataasiakkaanut namminersorlutillu suliffeqarfiutilinnut taamaallaat tunniunneqartartut ilaatigullu piginnittussaatitaanerit aamma soorlu spaniamiunut, hollandimiunut allanullu aamma tuniniarneqartarlutik. Taamaalillunilu aningaasat inuiaqatigiinnut iluaqusiissanatik,

Savalimmiuni Socialdemokraatit sinnerlugit lagtingimut qinigassanngortittoq, Sjudur Skaale. Taanna aamma oqarpoq isumasiuinerit malillugit Socialdemokraatit siuariarnissaat naatsorsuutigineqartoq.