Aalisariutip kivisimasup peerneqarnera piginnittumut akiligassiissutigineqassasoq

Aalisariut Nuummi Aalisartut talittarfiata eqqaani kivisimasoq Sikuki Harbour A/S-imit sapaatit-akunnerata siuliani paasineqarpoq. Aalisariut peerneqareerpoq piginnittorlu maanna akiligassinneqartussanngorpoq. Sikuki Harbour A/S nittartakkamini taama allaaserisaqarpoq.

- Angallatip kivinera qujanartumik angallatinut allanut sunniuteqarsimanngilaq, sillimaniarnermulli tunngatillugu navianaateqarlunilu angallatinut Aalisartut talittarfianiittunut akornutaavoq, Sikuki Harbour taama allappoq.

Angallat Sikuki isumaqatigiissuteqarfigeqqaarnagu Aalisartut talittarfianni talinngavoq. Tamannalu Sikukimit iluarineqanngilaq.

- Nuup umiarsualivia amerlaqisunut suliffeqarfiuvoq ulapaarfiusoq. Umiarsualivimmik atuisunut tamanut atugassarititaasut isumannaatsuunissaat qulakkeerniarlugu, umiarsualiviup atorneqarneranut malittarisassat aamma atuinissamik akiliuteqarnissamillu umiarsualivimmi oqartussanut isumaqatigiissutaasut malinneqarnissaat pingaaruteqarpoq.