Aalisarfigeqqusaajunnaarallartoq

Atlantikup avannamut kangiani nunat aalisarnermut ataatsimiititaliaata NEAFC-p ukiumoortumik ataatsimiinnerani isumaqatigiissutigineqarpoq itisuumi aalisarneq 30 %-imik annikillilerniarlugu, aalisarfinnilu arlalinni immap naqqa asattuunniarlugu aalisartoqarunnaavissasoq. Atlantikup avannamut kangiani imartat kikkunnilluunniit aalisarfiusinnaasut aalisarfigineri NEAFC-p qanoq pisaqartoqartiginissaa

aalajangiiffigisarpaa, pingaartumik suluppaakkat, saarullernat, makrel-it, saarulliillu illooraat kullerit qanoq annertutigisumik aalisarneqarnissaat killiliiffigisarlugu.

- NEAFC-p siulittaasuata Einar Lemchep, København-imi Nunatta aallartitaata oqaatigaa, aalisarfinni arlalinni immap naqqata aalisapiluffiunnginnissaa, naalakkersuinikkut isornartorsiorneqarnissaq pinngitsoorniarlugu, aalisarnerit unitsinneqartut.

- Aalajangiineq Nunatta aalisartuinut akornutaassanngilaq, amerlanerimmi aalisarnermut killeqarfiup 200 sømil-iusup iluani aalisartarmata, Einar Lemche naggasiivoq.