Aalisakkerivinni sulisorpassuit angerlartinneqarput
Ukiup sinneranut aningaasanik sinniilluni atuinissaq naatsorsuutigineqalerpoq.
- Ernumanermik manngertisimaarnermillu misigisimaffiuvoq, Borgmester Jess Svane aningaasaqarnermut ataatsimiititaliap ualimut ataatsimiinnginnerata siorna taama oqarpoq.
Qeqertarsuup tunuani qaleralinniarneq unitsinneqaqqammerpoq, ukiullu sinneranut qaleralittassat sinneruttut 200 tonsit decembarimi ulluni arlaqanngitsuni aalisarneqarsinnaajumaartut naatsorsuutigineqarpoq.
Uummannami Qeqertarsuullu tunuani qaleralinniarnerup unitsinneqarneratigut Royal Greenlandip, Halibut Greenlandip aamma Qeqertaq Fiship fabrikkiini sulisut 161-it sinneqartut angerlartinneqassasut, Radioaviisimit fabrikkinut paasiniaanerni oqaatigineqarpoq.
Taakkua saniatigut aalisartut angallatinilu inuttat nunamiilissapput. Uninngaannarnerlu Qaasuitsup kommuniata aningaasaqarneranut sunniuteqassasoq naatsorsuutigineqarpoq
- Nalunngisagut kisitsisit, taakkua angerlartitsinerit eqqarsaatigalugit ukua sanianiittut aalisartut unerartut saaffiginnittalernissaat imatut suli annerusumik tikinnagu, 9 millionit missaani sinniinissarput tassa naatsorsuusiorparput, taannalu aningaasaqarnermut ataatsimiititaliami qanoq orneriarsinnaanerlugu eqqartortussaasuarput, aamma kommunalbestyrelsi missingersuusiornermut naqissusiisarami, taakkununnga aamma ingerlateqqinneqartussaavoq, borgmester Jess Svane oqarpoq.
Aningaasaqarnermut Ataatsimiititaliap suleqatigiissitaq, borgmesterimit atorfilittalinnillu inuttalik ataatsimiinnerminni pilersippaa, taakku qaleralittassat peerneqarsimasut utertinneqarnissaannut suliniuteqassapput, sulisullu pikkorissarneqarnissaannut periarfissanik misissuissallutik.
- Tassa Uummannap aqutsiveqarfiani kvartalimi kingullermi pisassiissutaasuninngaanniit 100 tonsiniit tassanngaannartumik 350 tonsit peerneqarput. 650 tonsit qaammatini pingasuni isumalluutaasussat ingerlaannaq qaqinneqapallapput. Qeqertarsuup Tunua eqqarsaatigalugu, siorna 8800 tonsit pisassiissutigineqarput, ukioq mannalu 8000 tonsiinnaat pisassiissutigineqarlutik, taakkua 800 tonsit aamma 350 tonsit uterteqqinneqarnissaat piumasassatut innersuutigineqarpoq, Borgmester Jess Svane oqarpoq, nassuiaallunilu Namminersorlutik Oqartussat aamma Naalakkersuisut suleqatiginerisigut angerlartinneqartut pikkorissarneqarnissannut periarfissanik misissuissallutik.
