Aalisaatitaarsinnaanerup ajornanngippallaarnera mingutsitsisoq
Aalisaatit annaasimatillugit ajornanngippallaamik taarserneqarsinnaaneri qassutit ningittakkalluunniit amuarneqanngitsoortarnerinut pissutaaqataasoq Kalaallit Nunaanni Aalisarsinnaanermut Akuersissutinik Nakkutilliisoqarfimmi atorfilik isumaqarpoq.
- Kittorartoorluni katattoorluniluunniit qaqinniarnissaat soqutiginagit tunisassiorfinnut aalliinnartoqartarpoq. Nutaanik ningitsiinnariarluni aalisarnerup nangeqqinneqartarneranut tunisassiorfiit pisooqataasoraagut, KANUAANA-mi atorfilik Søren Hans Lynge oqarpoq.
Akissarsianit ilanngaasoqartarpot
Qassutit qaammatini 13-ini imaaniissimasut. Taakku sivisuumik imaaniissimagaluarlutik suli uumasunik pisaqartartut paasinarsivoq.
Piniutit annaasimatillugit tunisassiorfinni nutaanik pisinissaq periarfissaasoq, KNR-imit misissuigatta erserpoq. Sumili pisineq apeqqutaalluni aalisaatinik nutaanik pissarsisoqarsinnaasoq akissarsiassanit ilanngaatsilluni akiliisoqarsinnaasarluni.
Nutaanik aalisaatitaarsinnaanerup ajornanngippallaarnerata kinguneranik aalisaataarsiutit imminiiginnarneqartut, ukiorpassuarni aalisartuusup Anthon Egedep isumaqatigaa.
AAMMA ATUARUK Oprydning af spøgelsesnet er kommunernes ansvar
Qassutillu qallorneqanngitsut amerlivallaartillugit aalisarfiusut ornigineqarunnaartarput.
- Ningittakkanik annaasaqartarneq annertoorujussuaq massakkut pinikuuvoq. Annertusigaluttuinnarneranilu aalisarfigineqarsinnaasoq annikilligaluttuinnarpoq, Anthon Egede oqarpoq.
Pisuuteqattaartoqalersarpoq
Aalisartut ukiuni kingullerni amerlisimapput, sukannernerusumik aqutsisoqalinngippat akisussaassuseqaratik aalisartut amerliartuinnassasut, Aalisartut piniartullu kattuffiata siulittaasua Henrik Sandgreen naliliivoq.
- Aalisarnermi tattoqisaakkiartulersimanitta aalisartut akunnerminni imminnut pisuuteqattaannerannik kinguneqarnera erseqqarissiartorpoq. Taamaaginnassallunilu sukangasuumik aqutsisoqanngippat, Henrik Sandgreen oqarpoq.
AAMMA ATUARUK Kina qassutinut amuarneqanngitsoorsimasunut akisussaasuua
AAMMA ATUARUK Qassutit amuneqanngitsut akornutaasut
Aalisartummi piniutini nammineq akisussaaffigisussaagai annaagunigillu iliuuseqartussaasoq aalisartutoqqap oqaatigaa.
- Aalisartutoqqap taanna pissuseq atugarinngilaa, aalisartoq Anthon Egede oqarpoq.
