Aalborgip Uumasuusivissua Nunarput pillugu immikkut sammisaqarfiussasoq
Uumasuusivissuarmut pulaartut Issittumi pinngortitaq pillugu paasissutissiiffigineqartassapput, uumasuutit issittumeersut allanik ilaneqassapput ilisimatusarfinneersullu nunatsinni pissutsinik ilisimallit aamma ikiortigineqassallutik.
- Ilisimatusarfinneersut Kalaallit Nunaat ilisimatusarnikkullu suliniutitik oqaluttuariartorlugit ullut tamaasa takkuttassapput, Aalborgip Uumasuusivissuani pisortaq Henrik Johansen taama oqaluttuarpoq.
Uumasuusivissuup ilaata Skandinavia nunallu avannaarliit pillugit immikkut sammisaqarfiunissaa aallaqqaammut eqqarsaataasimagaluarpoq. Pilersaarutigineqartorli ukiut ingerlanerini allanngoriartorpoq maannalu Kalaallit Nunaat pillugu sammisaqarnissaq siunertarineqalerluni.
Pilersaarutit Namminersorlutik Oqartussat aamma Aalborgimi Kalaallit Illuutaat suleqatigalugit suliarineqarput, piviusunngortinnissaannullu Aalborgip Kommuniani kommunalbestyrelsimit akuerineqaqqaartussaallutik.
Tamatuma saniatigut aamma allilerinissamut 200 millionit koruunit missaannik akeqartussamut aningaasalersuisussarsiortoqassasoq, aviisi Nordjyske taama allaaserineqarpoq.