Aalborgip kommunia Nuummi sinniisoqarfittaalersoq
Kommuni nunani tamalaani suliniuteqarnerminut atatillugu 2,5 millionit koruuninik aappaagumut missingersuutimini immikkoortitsisimavoq, taakkualu sinniisoqarfimmik pilersitsinissamut atorneqassapput.
Aalborgip Nunattalu imminnut ungasinnerujussuat pissutigalugu suleqatigiinnerup ingerlaavarnerusumik ingerlanneqarnissaa ajornakusoorsimasoq kommunimit oqaatigineqarpoq.
Sinniisoqarfeqalernikkut tamatuma qaangerneqarsinnaanissaa nalilerneqarsimavoq.
AAMMA ATUARUK Aalborg Sermersoorlu suleqatigiinneruniarput
Aningaasarpassuit pineqarput
Kalaallit Nunaannimmi niueqateqarneq Aalborgimut Jyllandillu avannaanut 2,5 milliardit koruuninik naleqartussatut kommunip aappaagumut missingersuutaani annertussusilerneqarsimavoq, aammattaaq suliffiit 1.580-it niueqateqarnermut attuumassuteqarput.
Nunatta Aalborgip umiarsualivianik atuinera 2021-mi isumaqatigiinniutigineqaqqittussaavoq, Nunattalu nunarsuarmut siuariartornerata peqatigisaanik isumaqatigiissut taanna pingaaruteqaleriartuinnarluni.
AAMMA ATUARUK Aalborg nunatsinni sinniisoqarfiliulersaartoq
- Kikkut siunissami assartuussinermi sullississanersut pissanganarsiartuinnarpoq, taamaammat Kalaallit Nunaanni najuutinngikkaanni puigorneqarnissaq qaninnerusinnaalluni. Ulluinnarnili sulianut peqataanikkut, pissutsinik eqqartueqataanikkut aalajangeeqataasarnikkullu ajornannginnerulissaaq, borgmester Thomas Kastrup-Larsen Nordjyske Stiftstidendemut taama oqarpoq.